„ქართული ოცნების“ აღმასრულებელი მდივნის ირაკლი კობახიძის განცხადებით, პარტიულ რეიტინგებთან დაკავშირებით „რუსთავი 2“-ის მიერ გავრცელებული, ყოფილი პრემიერის ბიძინა ივანიშვილის კომენტარი კონტექსტიდან იყო ამოგლეჯილი.
კობახიძის თქმით, „რუსთავი2“-მა მაყურებელს ინფორმაცია ყალბი ფორმით მიაწოდა.
„გვინდა დავაფიქსიროთ ჩვენი პოზიცია იმ სიცრუესთან და სიყალბესთან დაკავშირებით, რომელიც ბოლო დღეების განმავლობაში ვრცელდებოდა „რუსთავი2“-ის მეშვეობით პარტიულ რეიტინგებთან დაკავშირებით.
პირველ რიგში, გავიხსენებთ იმას, რომ გაყალბდა ბიძინა ივანიშვილის სიტყვები და ისე იყო წარმოჩენილი, თითქოს ის მიიჩნევდა, რომ „ნაციონალურ მოძრაობას“ ჰქონდა 30%. სინამდვილეში მისი სიტყვები მთლიანად კონტექსტიდან იყო ამოგლეჯილი და ტელემაყურებელს ინფორმაცია ყალბი ფორმით მიეწოდა“, - განაცხადა კობახიძემ.
მისივე თქმით, „რუსთავი 2“-ის ჟურნალისტები „ჩამჭრელი კითხვებით“ ცდილობენ „ქართული ოცნების“ წარმომადგენლების შეცდომაში შეყვანას.
„გარდა ამისა, მომდევნო დღეებში „რუსთავი 2“-ის ჟურნალისტები, სამწუხაროდ, ცდილობდნენ „ქართული ოცნების“ წარმომადგენლების შეცდომაში შეყვანას. ისინი სხვადასხვა ფორმით ცდილობდნენ ე.წ. ჩამჭრელი კითხვების დასმას და ჩვენი მხრიდან იმის დადასტურებას, რომ “ნაცმოძრაობის“ 30% სინამდვილეს შეესაბამება. თუმცა მიზანს რეალურად ვერ მიაღწიეს იმის გამო, რომ ეს მაჩვენებელი არის მთლიანად აცდენილი რეალობას. „ნაცმოძრაობის“ რეიტინგი არის ბევრად ნაკლები, ვიდრე 30%. ბიძინა ივანიშვილის სიტყვების გაყალბება კი ნიკა გვარამიას გაყალბებული კვლევების შესაფუთად დასჭირდა“,-განაცხადა კობახიძემ.
„ქართული ოცნების“ აღმასრულებელი მდივანი „რუსთავი2“-ს მოუწოდებს მაყურებელს ბოდიში მოუხადოს.
„ამ ყველაფერზე არ გავამხვილებდით ყურადღებას, ეს ყველაფერი ჩაფიქრებული რევოლუციური სცენარის ნაწილი რომ არ ყოფილიყო, რომელიც მოაზრებული აქვთ „ნაციონალური მოძრაობის“ ლიდერებს, მათ შორის ნიკა გვარამიას. ამ რევოლუციურ სცენარს საქართველოში განხორციელება არ უწერია. ჩვენ კიდევ ერთხელ მოვუწოდებთ „რუსთავი 2“-ს ბოდიში მოუხადონ ტელემაყურებელს სიყალბის ტირაჟირებისთვის. ჩვენ მოგაწვდით ვიდეომასალას, რომელიც ადასტურებს იმას, რომ ბიძინა ივანიშვილის სიტყვები არის გაყალბებული და მას არც ერთხელ არ უხსენებია, რომ „ნაცმოძრაობას“ 30%-იანი რეიტინგი აქვს“, - განაცხადა „ქართული ოცნების“ აღმასრულებელმა მდივანმა.
