საპარლამენტო ფრაქცია „ქართული ოცნება - დემოკრატიული საქართველოს“ თავმჯდომარე გია ვოლსკი გამოეხმაურა თამარ ჩუგოშვილის მიერ დღეს გაკეთებულ განცხადებას იმის შესახებ, რომ „ნაციონალური მოძრაობა“ წინასაარჩევნოდ შესაძლოა, გარკვეულ არეულობას გეგმავდეს. მისი თქმით, საკმაოდ ინტენსიური საუბრები მიდის, თუ როგორ შეიჭრან ღონისძიებებზე, შეხვედრებზე და მოახდინონ პროვოკაცია.
„სიტყვა ,,შესაძლოა“ შეიძლება უადგილოც იყოს, ვინაიდან სხვადასხვა, ერთმანეთისგან დამოუკიდებელი წყაროები ამაზე მიანიშნებს. საქართველოში არაფერი არ იმალება, საკმაოდ ინტენსიური საუბრები მიდის, თუ როგორ შეიჭრან ღონისძიებებზე, შეხვედრებზე, როგორ მოახდინონ პროვოკაცია. მე პირადად მქონდა ასეთი საფრთხე, თუმცა ამის პრევენცია მოხდა, ძალიან ბევრი ხალხი იყო შეხვედრაზე და ეს ვერ განხორციელდა. ბევრი ასეთი შემთხვევაა, რომელიც მიანიშნებს, რომ საერთაშორისო თანამეგობრობის ყურადღების მისაქცევად დიდი შანსია, რომ ეს მოხდეს“, - განაცხადა ვოლსკიმ.
მმართველ გუნდში გაკეთებულ განცხადებებს დღეს გამოეხმაურა საქართველოს ყოფილი პრეზიდენტი მიხეილ სააკაშვილიც. მისი თქმით, ივანიშვილს მომავალი საპარლამენტო არჩევნები წაგებული აქვს.
„ივანიშვილმა და მისმა მარიონეტებმა დაიწყეს ძახილი, რომ თურმე ჩვენ ვამზადებთ არეულობას. როგორც წესი, ის მოწინააღმდეგეს აბრალებს თავის გეგმებს. ამ სურათზე კარგად ჩანს, როგორ არეულობას ვამზადებთ ჩვენ. არჩევნები ივანიშვილს წაგებული აქვს, რაც არ უნდა მოიმოქმედოს“, -წერს სააკაშვილი და სანდრა რულოვსის ამომრჩეველთან შეხვედრის ამსახველ ფოტოს აქვეყნებს.
ყოფილმა პრემიერმა ბიძინა ივანიშვილმა კი განაცხადა, რომ ,,საააკაშვილს უნდა სიტუაცია ააყირაოს და ამას უკიჟინებს თანაგუნდელებსაც“. მისი თქმით ამის მცდელობა იქნება და საჭიროა რაც შეიძლება ბევრი კამერა იყოს არჩევნებზე.
