ფრაქცია „ქართული ოცნების“ თავმჯდომარე პრეზიდენტის ადმინისტრაციის უფროსის მიერ, უზენაესი სასამართლოს მოსამართლეობის კანდიდატებთან დაკავშირებით გაკეთებულ განცხადებას შანტჟად აფასებს. გია ვოლსკი გიორგი აბაშიშვილს მოუწოდებს ,,ასეთი როყიო განცხადებებისაგან“ თავი შეიკავოს.
„ასეთი როყიო განცხადებებისაგან, ძალიან ვთხოვ, აბაშიშვილს, თავი შეიკავოს. ხალხი არ იყურებს, რა საკითხებზე გვაქვს დამთხვევა და სხვაობა პოზიციების, რაც ნორმალურია პოლიტიკურ ცხოვრებაში. საზოგადოებისთვის მნიშვნელოვანია, ინსტიტუტების წარმომადგენლები ღრმა პოლიტიკური ეთიკით დამშვენებული ფრაზებით საუბრობდნენ. ასეთი სანტაჟისტური განცხადებები უადგილოა და პოლიტიკური სკანდალის შექმნის მცდელობას გავს“,-აღნიშნა ვოლსკიმ.
საქართველოს პრეზიდენტის ადმინისტრაციის უფროსი გიორგი აბაშიშვილი პარლამენტს მოუწოდებს, უზენაესი სასამართლოს მოსამართლეობის კანდიდატებს მხარი დაუჭიროს. როგორც გიორგი აბაშიშვილმა ჟურნალისტებს განუცხადა, დღეს პარლამენტს მოუწევს, გააკეთოს არჩევანი ლევან მურუსიძესა და ანა დოლიძეს შორის.
,,ვფიქრობ, რომ პარლამენტის თითოეულ წევრს აქვს შესაძლებლობა, მურუსიძის მართვის სტილი სასამართლოში შეცვალოს. ამავე დროს, უნდა გვახსოვდეს, რომ სერიოზული პრობლემები შეექმნება უზენაესი სასამართლოს ნორმალურ ფუნქციონირებას, თუ დამატებით არ იქნება გამწესებული სამი მოსამართლე, ამიტომ რისკის ქვეშ ნუ დავაყენებთ უზენაეს სასამართლოს”, - განაცხადა გიორგი აბაშიშვილმა.
