წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2015 წელს 1351 მლნ აშშ დოლარი შეადგინა, რაც 6 %-ით აღემატება 2014 წლის წინასწარ შედეგებს და 23 %-ით ნაკლებია ამავე წლის დაზუსტებულ მონაცემებზე.
როგორც Policy and Management Consulting Group-ის (PMCG) ანალიტიკურ ინფორმაციაშია აღნიშნული, 2015 წლის მდგომარეობით, თბილისში განხორცილებული პირდაპირი უცხოური ინვესტიციების ჯამური მოცულობა, წინა წელთან შედარებით, 17,5%-ით არის შემცირებული. იმის გამო, რომ დანარჩენ საქართველოში პირდაპირი უცხოური ინვესტიციები კიდევ უფრო მეტად შემცირდა, ვიდრე თბილისში, დედაქალაქში განხორციელებული ინვესტიციების წილი მთლიან პირდაპირ უცხოურ ინვესტიციებში 5.5% პუნქტით გაიზარდა და 81% შეადგინა.
2015 წელს, თბილისის შემდეგ, უცხოელი ინვესტორებისთვის ყველაზე მიმზიდველი რეგიონებია აჭარა (9%), ქვემო ქართლი (4,1%) და სამეგრელო-ზემო სვანეთი და გურია (3,8%).
თბილისის მერიის ეკონომიკური პოლიტიკის საქალაქო სამსახურის ხელმძღვანელი ნოდარ ჭიჭინაძე GHN-თან საუბრისას განმარტავს, რომ წინასწარი და დაზუსტებული მაჩვენებლები საკმაოდ განსხვავდება ერთმანეთისგან და უფრო ზუსტი სურათის დანახვა მიმდინარე წლის აგვისტოში იქნება შესაძლებელი, ანუ როდესაც 2015 წლის დაზუსტებული მონაცემი გამოქვეყნდება.
(2014 წელს წინასწარი მონაცემებით პირდაპირმა უცხოურმა ინვესტიციებმა 1,274 მილიარდი დოლარი შეადგინა, დაზუსტებული მონაცემი კი 1,754 მილიარდი იყო. შესაბამისად სხვაობამ 480 მილიონი დოლარი შეადგინა. თუმცა, უნდა აღინიშნოს ისიც, რომ ინვესტიციების დათვლის მეთოდოლოგიის ცვლილებამ თავისი წვლილი შეიტანა 2014 წლის წინასწარ და დაზუსტებულ მონაცემებს შორის არსებულ სხვაობაში).
„ინვესტიციების შემომავალი ნაკადი ბოლო წლებია 2 მლრდ დოლარს აჭარბებს, ეს იმ ფონზე როდესაც წინა წლებში 1,5 მლრდ დოლარის ფარგლებში იყო. თუმცა გაზრდილია ინვესტორთა მიმართ ვალდებულებების შემცირება, რომელიც გულისხმობს ინვესტორებზე დივიდენდების გაცემას, სავაჭრო კრედიტების დაფარვას, სესხის და პროცენტის გადახდას. ანუ ინვესტიციების შემოდინება არ მცირდება, თუმცა იზრდება წლების წინ განხორციელებული ინვესტიციებით მიღებული მოგების რეპატრიაცია, უცხოური ინვესტორი კომპანიების მიმართ ადგილობრივი შვილობილი კომპანიების მიერ კრედიტის დაფარვა, რომელიც თავის დროზე აღირიცხა, როგორც ინვესტიცია.
ჩვენ ვიცით, რომ საქართველომ, როგორც კერძო ისე სახელმწიფო სექტორმა, 2004-2013 წლებში დიდი რაოდენობით სესხი დააგროვა, რომლის აქტიური დაფარვის პერიოდიც 2013 წლიდან დაიწყო. შესაბამისად, გაიზარდა ინვესტორთა მიმართ ვალდებულებების დაფარვის მაჩვენებელი, რაც ინვესტიციების წმინდა შემოდინების მაჩვენებელს ამცირებს. მიუხედავად ამისა, 2014 წელს დაფიქსირდა ინვესტიციების შემოდინების ერთ-ერთი ყველაზე მაღალი მაჩვენებელი (1,75 მლრდ დოლარი) დამოუკიდებელი საქართველოს ისტორიაში. რა თქმა უნდა, სასურველია რომ ინვესტიციები ყოველწლიურად იზრდებოდეს, თუმცა 2014 წელს დაფიქსირებული პიკური მაჩვენებლის შემდეგ მცირე კლება, არ არის დიდი ტრაგედია“, -აცხადებს თბილისის მერიის ეკონომიკური პოლიტიკის საქალაქო სამსახურის ხელმძღვანელი ნოდარ ჭიჭინაძე.
როგორც ჭიჭინაძე განმარტავს, მნიშვნელოვანია ასევე ინვესტიციების სტრუქტურა. მაგალითად, თუ უცხოელი ინვესტორი შეიძენს ადგილობრივი საწარმოს 10%-ზე მეტს, ეს პირდაპირი უცხოური ინვესტიციაა. ასევე პირდაპირი უცხოური ინვესტიციაა თუ უცხოელი ინვესტორი ააშენებს ახალ საწარმოს.
„არადა, მეორე შემთხვევაში ადგილი აქვს ახალი აქტივების შექმნას, ქვეყანაში კაპიტალის ზრდას. ამ მხრივ, საკმაოდ კარგი სიტუაცია იყო 2015 წელს (პირველ სამ კვარტალში, რადგან წლიური მონაცემი ჯერ არ გამოქვეყნებულა).
2015 წლის პირველ 3 კვარტალში ქვეყანაში ძირითადი კაპიტალის ფორმირებამ შეადგინა 6,68 მლრდ ლარი (2,82 მლრდ დოლარი), რაც ლარებში 21%-ით აღემატება 2014 წლის სამი კვარტლის მაჩვენებელს, მაგრამ დოლარში გამოსახული 5,6%-ით არის შემცირებული (მაგრამ აღსანიშნავია, რომ ძირითადი კაპიტალის ფორმირება ხდება ადგილობრივ ვალუტაშიც, რის გამოც ცალსახად ლარში ან ცალსახად დოლარში გამოსახულების შედარება, ბოლომდე გამართლებული არ არის). ანუ გამოდის, რომ 2015 წლის სამ კვარტალში ქვეყანაში ფორმირდა არანაკლები ღირებულების გრძელვადიანი აქტივები (ინფრასტრუქტურა, დანადგარები, შენობები და ა.შ.), ვიდრე 2014 წელს, რომელიც ამ მხრივ ერთ-ერთი გამორჩეული წელი იყო დამოუკიდებელი საქართველოს ისტორიაში“,- განმარტავს GHN-თან საუბრისას ნოდარ ჭიჭინაძე.
