ხვალ, 20 მაისს, საქართველოს საკითხზე ევროპარლამენტში იმსჯელებენ.
შეუსრულებელი ვალდებულებების გამო კრიტიკის მოსმენა რუსეთს ამჯერად აღნიშნული ტრიბუნიდან მოუწევს. ევროპის საბჭოსა და ბენელუქსის ქვეყნებში საქართველოს საგანგებო და სრულუფლებიანი ელჩის სალომე სამადაშვილის განცხადებით, სამხრეთ-კავკასიის შესახებ მოხსენებაში, რომელშიც საქართველოში არსებულ ვითარებაზე დეტალურადაა საუბარი, ცხინვალის რეგიონი და აფხაზეთი პირველად იქნება მოხსენიებული, როგორც "ოკუპირებული ტერიტორიები".
"მნიშვნელოვანია, რომ მოხსენებაში სრულიად ადექვატურად არის შეფასებული არსებული ვითარება ცეცხლის შეწყვეტის ხელშეკრულების შესრულებასთან დაკავშირებით და არის მოწოდება რუსეთის მხარისადმი, რომ დაიწყოს მისი შესრულება. ამასთან ხაზგასმულია ისიც, რომ საქართველოს ტერიტორიები ოკუპირებულია და ევროკავშირმა უფრო მეტი ზეწოლა უნდა განახორციელოს რუსეთზე, რათა საქართველოს ტერიტორიების დეოკუპაცია მოხდეს", - აცხადებს სალომე სამადაშვილი.
სწორედ იმის გამო, რომ მოხსენებაში რუსეთის მიერ ანექსირებული ტერიტორიები "ოკუპირებულებადაა" მოხსენიებული ხვალინდელ სესიაზე მწვავე დებატებს ელოდებიან. დოკუმენტში საქართველოს ტერიტორიების ამ სახით ფორმულირებას, სავარაუდოდ, რუსეთის წარმომადგენელთა პროტესტი მოჰყვება.
