საქართველოს საგარეო საქმეთა სამინისტრო ალექსანდრე ლუკაშენკოსა და ბელარუსის 169 მარალჩინოსანის მიმართ სანქციების გაუქმებას ეხმიანება.
,,საქართველოს საგარეო საქმეთა სამინისტრო მიესალმება ევროკავშირის საგარეო საქმეთა მინისტრების საბჭოს 2016 წლის 15 თებერვლის გადაწყვეტილებას ბელარუსის რესპუბლიკის მიმართ დაწესებული შეზღუდვების დიდი ნაწილის გაუქმების შესახებ.
მიგვაჩნია, რომ აღნიშნული გადაწყვეტილება წარმოადგენს კიდევ ერთ წინ გადადგმულ ნაბიჯს პარტნიორებს შორის თანამშრომლობის გაღრმავების თვალსაზრისით, რაც თანხვედრაშია როგორც ბელარუსის ისე ევროპის ინტერესებთან.
ქართული მხარე მიესალმება ბელარუსსა და ევროკავშირს შორის ურთიერთობების გააქტიურებას, რაც ხელს შეუწყობს რეგიონის ეკონომიკურ განვითარებასა და „აღმოსავლეთ პარტნიორობის“ საერთო მიზნების მიღწევას“, - ნათვამია უწყების მიერ გავრცელებულ განცხადებაში.
ევროკავშირის გადაწყვეტილებით, ეკონომიკური სანქციები ბელარუსის ლიდერთან ერთად 169 ბელარუს მაღალჩინოსანსაც მოეხსნება. ამასთან, ბრიუსელი მინსკთან იარაღით ვაჭრობაზე დაწესებულ სანქციებს ძალაში დატოვებს. პერსონა ნონ გრატად დარჩება 4 ბელარუსი ძალოვანიც, რომლებიც 1999-2000 წლებში ლუკაშენკოს პოლიტიკურ ოპონენტებზე ანგარიშსწორებაში არიან ეჭვმიტანილნი.
მინსკის წინააღმდეგ ბრიუსელმა სანქციები 1998 წლიდან აამოქმედა. შეერთებული შტატები სანქციებს 2006 წელს შეუერთდა.
