ქალაქ თბილისის მერიას, ევროპულ ქართულ საზოგადოება EUGS-ს და წარმატებულ ქალთა საერთაშორისო კლუბ ISWC-ს შორის ურთიერთთანამშრომლობის მემორანდუმი გაფორმდა. მემორანდუმს ხელი, ერთის მხრივ, თბილისის მერმა დავით ნარმანიამ, ხოლო, მეორეს მხრივ, ანა რეხვიაშილმა მოაწერეს.
მერიის ინფორმაციით, მემორანდუმის თანახმად, მხარეები შეთანხმდნენ, რომ ხელს შეუწყობენ ერთმანეთის რეპუტაციის და ავტორიტეტის გაძლიერებას, როგორც ქვეყნის შიგნით, ისე საერთაშორისო ასპარეზზე. ამასთან, ხელმომწერმა მხარეებმა გამოხატეს სურვილი ერთობლივად ითანამშრომლონ ევროკავშირის ქვეყნებთან და საქართველოში რეგისტრირებულ არასამთავრობო ორგანიზაციებთან, სამოქალაქო მოძრაობებთან და
საერთაშორისო ორგანიზაციებთან, ურთიერთობების გაღრმავების, კომუნიკაციის გაძლიერების და ორმხრივ და მრავალმხრივ თანამშრომლობასთან დაკავშირებული ღონისძიებების ორგანიზებაში.
მემორანდუმის მიხედვით, მხარეები უზუნველყოფენ საქართველო - ევროკავშირს შორის ქალთა პრობლემების, ბიზნესფორუმების, საერთაშორისო პროექტებში ჩართულობის, მრგვალი მაგიდების, სადისკუსიო კლუბების, კულტურულ და საგანმანათლებლო საკითხებთან დაკავშირებით გასამართი ან დაგეგმილი ღონისძიებების შესახებ ინფორმაციის გაცვლას და მათში ერთობლივ, კოორდინირებულ საქმიანობას და ჩართულობას. ამასთან, აქტიურად მიიღებენ მონაწილეობას ევროკომისიის, ევროპარლამენტის, გაეროს და სხვა საერთაშორისო ორგანიზაციების მიერ გამართულ წარმომადგენლობით ღონისძიებებში და აქტიურად განახორციელებენ როგორც უფლებრივი დაცვის, ასევე, ეკონომიკურ, კულტურულ და საგანმანათლებლო საერთაშორისო პროგრამებსა და პროექტებს.
ამასთან, მხარეები ურთიერთშეთანხმების საფუძველზე მოამზადებენ წინადადებებს, ინიციატივებსა და პროექტებს ქალაქ თბილისის პოპულარიზაციისთვის საერთაშორისო ასპარეზზე.
