დღეს ცენტრალური, საოლქო და საუბნო საარჩევნო კომისიების წარმომადგენლებმა ეთიკის კოდექსს ხელი მოაწერეს. სულ ეთიკის კოდექსს ხელი საარჩევნო ადმინისტრაციის 48 064 თანამშრომელმა მოაწერა.
როგორც ცესკოში განმარტავენ, ეთიკის კოდექსზე ხელის მოწერით ცესკოს, საოლქო და საუბნო საარჩევნო კომისიის თავმჯდომარეები და წევრები ადასტურებენ, რომ იხელმძღვანელებენ კანონით და პატივს სცემენ მას.
საარჩევნო ადმინისტრაციის მოხელეებმა ყველა პარტიის, კანდიდატის, ამომრჩევლისა და არჩევნებში მონაწილე სხვა ნებისმიერი პიროვნებისათვის უნდა უზრუნველყონ თანაბარი და სამართლიანი პირობები. მიუკერძოებლობის მიზნით მათ თავი უნდა აარიდონ ისეთ მოქმედებას, რომელიც შეიძლება აღქმულ იქნას როგორც პოლიტიკური სუბიექტის მხარდაჭერა.
გამჭვირვალების მიზნით საარჩევნო მოხელეებმა უნდა უზრუნველყონ ისეთი პირობები, რომელიც ხელს შეუწყობს დაინტერესებულ მხარეებს საარჩევნო პროცესთან ან საარჩევნო ადმინისტრაციის საქმიანობასთან დაკავშირებული ინფორმაციის, დოკუმენტებისა და მონაცემთა ბაზების დროულად მიღებაში. ასევე უნდა გამოამჟღავნონ ის პრობლემები, რომლებიც გამოვლინდება საარჩევნო პროცესში. საარჩევნო დოკუმენტაცია კანონმდებლობის შესაბამისად გახადონ საზოგადოებისთვის ხელმისაწვდომი.
ამომრჩევლებისთვის დახმარების მიზნით უნდა შექმნან ხმის მიცემის გამარტივებისთვის ხელსაყრელი პირობები, საჭიროებისამებრ აუხსნან ამომრჩევლებს საარჩევნო პროცედურები, უზრუნველყონ შეზღუდული შესაძლებლობის მქონე მოქალაქეთა და ეთნიკური უმცირესობის წარმომადგენელთა არჩევნებში მონაწილეობის მიღების შესაძლებლობა.
ეთიკის კოდექსი ავალდებულებს ხელმომწერ მხარეებს, რომ პატივი სცენ მათ, ვისაც ისინი ემსახურებიან - საქართველოს ამომრჩევლებს. ეთიკის კოდექსი შემუშავებულია საერთაშორისო პრინციპების გათვალისწინებით.
მსგავს ეთიკის კოდექსს საარჩევნო ადმინისტრაციის მოხელეებმა ხელი 2008 წელს მოაწერეს, რომლის შემუშავებაში აქტიურად მონაწილეობდა გაეროს განვითარების პროგრამა და "საარჩევნო სისტემების განვითარების ფონდი" (IFES).
