პარლამენტის თავმჯდომარის, დავით უსუფაშვილის ინფორმაციით, მმართველი გუნდი პრემიერ-მინისტრობის კანდიდატზე მიმდინარე კვირის პარასკევს იმსჯელებს და გადაწყვეტილებას მიიღებს. როგორც ჟურნალისტებს უსუფაშვილმა განუცხადა, მას შემდეგ, რაც პრემიერ-მინისტრმა პოსტიდან გადადგომის შესახებ მიიღო გადაწყვეტილება, ახლა უკვე საპარლამენტო უმრავლესობის ჯერია.
მისი განმარტებით, საქართველოს კონსტიტუციის შესაბამისად, საპარლამენტო უმრავლესობამ პრემიერ-მინისტრობის კანდიდატი უნდა დაასახელოს და ის უახლოესი ერთი კვირის განმავლობაში, პრეზიდენტს უნდა წარუდგინოს.
„საპარლამენტო უმრავლესობა აღნიშნულ საკითხზე პარასკევს იმსჯელებს და გადაწყვეტილებას მივიღებთ. რაც შეეხება პარლამენტის მიერ ახალი მთავრობის გამოცხადების საკითხს, ჩემი წინასწარი ვარაუდით, ეს საკითხი მომავალი კვირის დასაწყისში დასრულდება. ჩვენ იმას მოვახერხებთ, რომ ახალი წლისთვის, საქმიანობას ახალი მთავრობა გააგრძელებს. ძალიან ბევრ ქვეყანაში, მოვალეობის შემსრულებელი მთავრობები ქვეყანას თვეების განმავლობაში მართავენ და ჩვენს შემთხვევაში ეს პროცესი ერთი კვირის განმავლობაში გაგრძელდება”, - განაცხადა უსუფაშვილმა.
