რუსეთის საგარეო საქმეთა მინისტრი სერგეი ლავროვი აცხადებს, რომ რუსეთის ფედერაცია ვერ ხედავს "პრინციპულ წინააღმდეგობებს" საქართველოსთან საჰაერო მიმოსვლის აღდგენასთან დაკავშირებით.
"ჩვენ უცვლელად ვასრულებთ ქართული ავიაკომპანიების მოთხოვნებს და სადღესასწაულო დღეებში ჩარტერულ რეისებს ვასრულებთ. ჩვენ ასევე ვერ ვხედავთ პრინციპულ წინააღმდეგობებს რეგულარული ავიამიმოსვლის აღდგენისათვის", _ აცხადებს სერგეი ლავროვი.
ლავროვი აცხადებს, რომ რუსული მხარე არსებულ სიტუაციაში ცდილობს გააკეთოს ყველაფერი იმისათვის, რომ გადაწყვიტოს პრაქტიკული და ჰუმანიტარული საკითხები რომელიც ორი ქვეყნის მოქალაქეებს აღელვებთ.
აღსანიშნავია, რომ საქართველოსა და რუსეთს შორის პირდაპირი რეისები პირველად 2006 წელს გაუქმდა. შემდეგ მცირე ხნით აღდგა და 2008 წლის აგვისტოს რუსეთ-საქართველოს ომის შემდეგ შეწყდა.
