პარლამენტის თავმჯდომარე დავით უსუფაშვილი ვერ აკონკრეტებს, საკანონმდებლო ორგანო ეროვნული ბანკის პრეზიდნეტს, გიორგი ქადაგიძეს თუ როდის მოუსმენს.
როგორც დღეს გამართულ პრესკონფერენციაზე უსუფაშვილმა განაცხადა, დაპირებისამებრ, მან ქადაგიძეს დაურეკა და ჰკითხა, პარლამენტს როდის ეწვეოდა.
„მას ვუთხარი, რომ მას პარლამენტი ნებისმიერ დროს მოუსმენს, როცა ის ამას საჭიროდ ჩათვლის. ეს არ უკავშირდება იმას, რომ მის გრაფიკში ან ჩვენსაში ორი საათი ვერ მოიძებნა. ანგარიში გავუწიეთ იმ ვითარებას, რაც შექმნილი იყო ლარის კურსთან არსებულ საკითხებზე. რაღაც თემების წამოწევა არ იყო აუცილებელი, სანამ ვითარება რა დასტაბილურდებოდა. პარლამენტმა იმდენი ისმინა ეროვნულ ბანკზე, რომ ჩაითვალა, საერთო საქმეს ეს უფრო მოუხდებოდა“, - განაცხადა უსუფაშვილმა, რომელმაც გასულ პრესკონფერენციაზე პირობა დადო, რომ ქადაგიძეს დაურეკავდა და გაარკვევდა, უწყებას როდის ესტუმრება.
ეროვნულმა ბანკმა გასული წლის ანგარიში პარლამენტს მაისში წარუდგინა, თუმცა, დოკუმენტი ამ დრომდე განხილული არ არის. ანგარიში მოსმენილი მხოლოდ კომიტეტების ფორმატში იქნა.
