„თუკი მარჯვენასაჭიან ავტომობილებს მიესალმებით, მაშინ ნარმანიას მივმართოთ, რომ იაფიანი, მარჯვენასაჭიანი ავტობუსები შემოიყვანოს და ყველა კმაყოფილი იქნება“, - ამ ფორმით დააფიქსირა საკუთარი პოზიცია პარლამენტის თავმჯდომარემ, დავით უსუფაშვილმა შინაგან საქმეთა მინისტრის ახალ ინიციატივასთან დაკავშირებით,
როგორც დღეს გამართულ პრესკონფერენციაზე უსუფაშვილმა განაცხადა, გადაწყვეტილება იქნება მიღებული, რომ ასეთი ავტომანქანები საქართველოში აღარ შემოვიდეს.
„თუ ასეთი რბილი მიდგომა იქნება, ეს იმას ნიშნავს, რომ თუ მარჯვენასაჭიანი ავტომობილი მყავს, შემიძლია თავისუფლად ვიარო და არავინ არაფერს მერჩის, არ მაჯარიმებს. ასევე, შემიძლია ის გავყიდო და აქ აკრძალვა არ არის. ლოგიკა, არ არის, რომ შიდა გაყიდვა აკრძალო და ამიტომ ეს აჟიოტაჟი, ის შემთხვევაა, როცა სამინისტროს მხრიდან მეტი განმარტებაა საჭირო. საგზაო უსაფრთხიების საკითხების ექსპერტად ვერ გამოვდგები, მაგრამ რაღაც მგონია, რომ უხერხულობები ჩნდება. უამრავი საკითხია, რომელსაც სხვადასხვა მხრიდან უნდა შევხედოთ. სადღაც შეიძლება უკანა მხარეს საჭე აქვთ და ის მანქანები შემოვიყვანოთ, იმიტომ, რომ იაფია? რაღაც უსაფრთხოების სისტემა და წესები არსებობს. ავტობუსებიც არსებობს მარჯვენასაჭიანი და იაფი იქნება. ახლა ნარმანია 200 ავტობუსი მარჯვენასაჭიანი რომ შემოიყვანოს, ეკონომიურად გამართლებული იქნება და კომპანიები გაიხარებენ და თქვენ მიესალმებით? - მგონი არ მიესალმებით. მარჯვენასაჭიანი ავტობუსი, რომელშიც ამდენი ხალხი უნდა ავიდეს, ხიფათის შემცველია“, - დასძინა უსუფაშვილმა.
