"სახალხო მართლმადიდებლური მოძრაობის" თავმჯდომარე მალხაზ გულაშვილი "ჯი-ეიჩ-ენთან" საუბარში აცხადებს, რომ მის მოძრაობას საქართველოს კათოლიკოს-პატრიარქის, ილია მეორის ან რომელიმე მღვდელმთავრის კურთხევა არ აქვს.
"არავითარი შეხება არ გვაქვს საპატრიარქოსთან. დედის გინებაზე პასუხის გაცემას არავითარი კურთხევა არ სჭირდება. როცა დედას გაგინებენ, იმისთვის, გასცე თუ არა პასუხი, დედასთან ხომ არ მირბიხარ? შესაბამისად, ჩვენ ღვთისმშობელს გვიგინებენ და პასუხის გასაცემად არავისგან გვჭირდება ნებართვა", - აცხადებს გულაშვილი.
მისივე თქმით, ის პოლიტიკა, რომელსაც საქართველოში "თავისუფლების ინსტიტუტი" ატარებს, აბსოლუტურად მიუღებელია და შესაბამისად, აღნიშნული ინსტიტუტეს საქმიანობა საქართველოში უნდა აიკრძალოს.
"ის, რაც ჩვენ მოგვიწვეს ტელეკომპანია "კავკასიაში", იყო "თავისუფლების ინსტიტუტის" მიერ მოწყობილი პროვოკაცია, რომელშიც ტელეკომპანია "კავკასიის" თანამშრომლები მონაწილეობდნენ", - განაცხადა გულაშვილმა და დასძინა, რომ მისთვის ცნობილია იმის შესახებაც, თუ როგორ თანამშრომლობს ოპოზიციას ამოფარებული რიგი პოლიტიკოსი "ამ გარყვნილ" ინსტიტუტთან.