პარლამენტის თავმჯდომარე დავით უსუფაშვილი მიიჩნევს, რომ 21-ე საუკუნის პირობებში, ყველა ქვეყანაში, საკანონმდებლო ორგანოს გამოწვევები სრულიად ახალ ელფერს იძენს.
საპარლამენტო საქმიანობაზე უსუფაშვილმა სემინარზე ისაუბრა, რომელიც საკანონმდებლო ორგანოში ამ წუთებში მიმდინარეობს.
სპიკერის თქმით, ის პროექტი, რომელსაც საქართველოს პარლამენტი ეუთოს, ODIHR- ის ვარშავის ოფისთან ერთად ახორციელებს, წარმატებულია.
„წარმომადგენლობითი დემოკრატიის მარტივი გაგება იმის თაობაზე, რომ ხალხმა დეპუტატები აირჩია და გარკვეული ვადის განმავლობაში, კანონმდებლები იღებენ სწორ, ჭკვიანურ და ეფექტურ გადაწყვეტილებებს, ასე მარტივი აღარ არის. ეს ახალი გამოწვევები იმ პრიორიტეტებსა და იმ სტანდარტებს უკავშირდება, რომლებიც განსაკუთრებით, 21-ე საუკუნის პირობებში, სრულიად ახალ ელფერს იძენს. კომუნიკაციის თანამედროვე საშუალებები იმის შესაძლებლობას იძლევა, რომ ყოველი ჩვენი ნაბიჯი იყოს კვალიფიციური და ზოგჯერ არც თუ ისე კვალიფიციური, მაგრამ აქტიური კრიტიკის ქვეშ. გლობალიზაციამ თითოეულ ქვეყანას თავისი ახალი ამოცანები დაუყენა, იმიტომ, რომ ჩვენ დიდი ხანია კანონებს აღარ ვიღებთ მხოლოდ საკუთარი მოქალაქეებისთვის. ჩვენ კანონებს ვიღებთ ძალიან ბევრი სხვა მოქალაქეებისთვისაც. ის სტატისტიკა, რომელიც ერთი მხრივ გვახარებს, რომ ბევრი ტურისტი ჩამოდი საქართველოში, ბევრი ბიზნესმენი ჩამოდის საქართველოში, ნიშნავს იმასაც, რომ საქართველოს მოქმედი კანონმდებლობა ამ ადამიანებისთვისაც მნიშვნელოვანი ხდება“, - აცხადებს უსუფაშვილი.
სპიკერის განმარტებით, როდესაც პარლამენტი კანონს იღებს, იმის შემოწმება ხდება, უკვე მიღებულმა კანონმა მიაღწია თუ არა იმ შედეგს, რაც იყო თვის დროზე გამიზნული.
„ასევე ვინტერესდებით, ხომ არ არის ის შემთხვევა, რომ იყო ძალიან კეთილშობილური მიზანი, მაგრამ რაღაც მიზეზების გამო ვიღებთ უკუშედეგს? ან ხომ არ არის ის შემთხვევა, როდესაც ვერ გავითვალისწინეთ, ვერ გავიაზრეთ ყველა ის არაპირდაპირი გავლენა საზოგადოებრივ ცხოვრებაზე, რასაც ამა თუ იმ ნორმის შემოღება ითვალისწინებს?!“, - დასძენს უსუფაშვილი.
პარლამენტში სემინარი მიმდინარეობს თემაზე - „გაუმჯობესებული რეგულირების ზემოქმედების/გავლენებისა და კანონმდებლობის მონიტორინგის ცალკეული ასპექტები“.
