რეინტეგრაციის საკითხებში სახელმწიფო მინისტრ თემურ იაკობაშვილის განცხადებით, ქართული მხარე ომის განახლებას არ აპირებს.
"საქართველო ომის დაწყებას არ აპირებს და ჩვენ ეს 6-პუნქტიან დოკუმენტზე ხელმოწერითაც დავადასტურეთ, მაგრამ თუ დამატებითი გარანტიებია საჭირო, ჩვენ მზად ვართ, მსგავი დოკუმენტი რუსეთთან და თუნდაც საერთაშორისო თანამეგობრობასთანაც გავაფორმოთ," - ამის შესახებ იაკობაშვილმა "ჯი-ეიჩ-ენს" აფხაზეთის ე.წ. საგარეო საქმეთა მინისტრის მაქსიმ ღვინჯიას განცხადებაზე კომენტირებისას განუცხადა.
შეგახსენებთ, რომ აფხაზეთის ე.წ. საგარეო საქმეთა მინისტრის განცხადებით, აფხაზური მხარე მზადაა საქართველოსთან პირდაპირი დიალოგი აწარმოოს, თუმცა ამისთვის მას გარანტიები სჭირდება. კერძოდ, როგორც ღვინჯიამ "ჯი-ეიჩ-ენს" განუცხადა, "საქართველომ ომი არ უნდა დაიწყოს და აფხაზეთის ე.წ. ხელისუფლება მხარედ აღიაროს".
