სომხეთში გაზის ტრანზიტი პრობლემის აღმოფხვრისთანავე განახლდება.
საქართველოს გაზისა და ნავთობის კორპორაციის ინფორმაციით, მეწყერის გამო, დაზიანებული ჩრდილოეთ-სამხრეთის მაგისტრალური გაზსადენის რეაბილიტაცია გრძელდება.
6 მაისს საქართველოს გაზის ტრანსპორტირების კომპანიამ გაზსადენი ტესტირების რეჟიმში ამუშავა, რის შედეგადაც დუშეთის რაიონში გაზსადენის სხვადასხვა უბანზე რამდენიმე ახალი დაზიანება აღმოჩნდა.
ადგილზე საქართველოს გაზის ტრანსპორტირების კომპანიის რამდენიმე სამუშაო ჯგუფი მუშაობს.
საქართველოს გაზის ტრანსპორტირების კომპანია პრობლემის აღმოფხვრას რამდენიმე დღეში ვარაუდობდა, თუმცა, დუშეთის ოთხ სოფელში 4 მაისს მეწყერის ჩამოწოლამ და კლდიდან 20-ტონიანი ლოდის ჩამოშლამ მილსადენის სხვა მონაკვეთებიც დააზიანა.
გუდაური-კობის მონაკვეთზე საქართველოს მაგისტრალური გაზსადენის მეწყერის შედეგად დაზიანების გამო სომხეთში გაზის ტრანზიტი 28 აპრილს შეწყდა.
