ნატო იქმნებოდა სწორედ იმ ღირებულებების და საზოგადოების ირგვლივ, როგორც იქმნება და ყალიბდება ჩვენი სახელმწიფო, - ამის შესახებ საქართველოს პრეზიდენტმა, გიორგი მარგველაშვილმა სასტუმრო "რუმსში" განაცხადა, სადაც ნატო-ს კვირეულის ფარგლებში, დიპლომატიური კორპუსისა და არასამთავრობო ორგანიზაციების წარმომადგენლებს ხვდება.
მისივე თქმით, საქართველო ისტორიულად თავისუფლების მოყვარე ინდივიდების და ადამიანების ერთობაა.
,,ნატო შეიქმნა, როგორც უსაფრთხოების სისტემა, იმ სახელმწიფოებისთვის, რომელშიც თავისუფალი ადამიანები ვქმნით თავისუფალ საზოგადოებას და თავისუფალ სახელმწიფოს. ამ ღირებულებების ირგვლივ ერთიანდებოდა და მტკიცდებოდა ეს სისტემა. ჩვენი ქვეყანაც სწორედ ისტორიულად ასე თავისუფალი, თავისუფლების მოყვარე ინდივიდების და ადამიანების ერთობაა, რომლებიც მოღვაწეობენ, რათა შექმნან თავისუფალი საზოგადოება, რომელშიც ყველა ჯგუფს შეუძლია, ერთდროულად გამოხატოს თავისი პოზიციები, ამავე დროს იცხოვროს ერთიან სისტემაში", - განმარტა საქართველოს პრეზიდენტმა.
მისივე თქმით, საქართველოს ურთულეს გეოპოლიტიკურ ვითარებაში უწევს დემოკრატიის განვითარება.
"საქართველომ ალბათ ბევრი ნაბიჯი გადადგა იმ მიმართულებით, რათა ეჩვენებინა, რომ ეს ჩვენი რეალური იდეალებია. ძალიან რთულ ვითარებაში, როდესაც ბევრი გამოწვევა აქვს, როგორც საზოგადოებას, ისე სახელმწიფოს, ჩვენ ვქმნით, ვავითარებთ და ვაძლიერებთ დემოკრატიას. ურთულეს გეოპოლიტიკურ ვითარებაში, როდესაც საქართველო გახდა პირველი დარტყმის ობიექტი 2008 წელს, რის შედეგაც ჩვენი ტერიტორიები იქნა ოკუპირებული, ჩვენ მაინც ვქმნით დემოკრატიულ სახელმწიფოს, ურთულეს რეგიონში ჩვენ ვავითარებთ ჩვენს სტატეგიულ მიზანს, რომ ვიყოთ კავკასიაში მშვიდობის, თანამშრომლობის და ერთიანი, მშვიდობიან მომავალზე ორიენტირებული რეგიონის მნიშვნელოვანი განმაპირობებელი ძალა. ასევე, ვქმნით ძალას თანამშრომლობისა ევროპასა და აზიას შორის", - აღნიშნა გიორპრეზიდენტმა.
