ევროატლანტიკურ სტრუქტურებში ინტეგრაციის საკითხებში სახელმწიფო მინისტრის, დავით ბაქრაძის განცხადებით, 2014-2015 წლებში, საქართველო-ევროკავშირის ურთიერთობა ძალიან დინამიურად ვითარდებოდა, რადგან ასოცირების დღის წესრიგის ეროვნული სამოქმედო გეგმები შემუშავდა.
დავით ბაქრაძემ ასოცირების დღის წესრიგის სამოქმედო გეგმის შესრულების თაობაზე პარლამენტის ორი კომიტეტის გაერთიანებულ სხდომაზე ისაუბრა.
მინისტრის ცნობით, 2015 წლის პირველ ნახევრაში, ძალიან მოცულობითი სამუშაო განხორციელდა.
მისი ინფორმაციით, იმისათვის, რომ სამოქმედო გეგმის განხორციელების პროცესში რაიმე პრობლემა არ შეიქმნას, საჯარო მოხელეებისთვის 140-მდე ტრეინინგი ჩატარდა.
ბაქრაძის განცხადებით, მის აპარატსა და სამოქალაქო სექტორს შორის აქტიური თანამშრომლობა მიმდინარეობს და უახლოეს მომავალში, 2016 წლის სამოქმედი გეგმა შემუშავდება.
„ამ ეტაპისთვის, ჩვენს აპარატს სამინისტროებისგან მიღებული აქვს 2016 წლის გეგმის ძირითადი ნაწილი, რომლის ერთიან ფორმატში ჩამოყალიბებაზე ვზრუნავთ. ჩვენი მიზანია, სამოქმედო გეგმის შემუშავება ახალ დონეზე ავიყვანოთ, რაც იმას გულისხმობს, რომ თუკი გასულ წელს ღონისძიებები იყო დაგეგმილი, მას შედეგების და ინდიკატორების ნაწილი უნდა დაემატოს“, - განაცხადა მინისტრმა.
