„თბილისის აბრეშუმის გზის ფორუმი“ მუშაობას აგრძელებს. დღეს იმართება პანელი სახელწოდებით „საქართველოში არსებული საინვესტიციო შესაძლებლობები“. პანელის მუშაობაში მონაწილეობენ საქართველოს პრემიერ-მინისტრი ირაკლი ღარიბაშვილი და ეკონომიკისა და მდგრადი განვითარების მინისტრი დიმიტრი ქუმსიშვილი. ისინი ფორუმის მონაწილე უცხოელ სტუმრებს გააცნობენ ინფორმაციას საქართველოს ეკონომიკური პოტენციალის და საინვესტიციო შესაძლებლობების შესახებ. ეკონომიკისა და მდგრადი განვითარების მინისტრმა მედიისთვის კომენტარი გააკეთა, სადაც ვრცლად ისაუბრა ფორუმის და კონკრეტულად ამ პანელის მნიშვნელობაზე:
„დღეს „თბილისის აბრეშუმის გზის ფორუმის“ ძალიან მნიშვნელოვანი დღეა, გვექნება დისკუსია საქართველოს საინვესტიციო პოტენციალზე, შესაბამისად, ფორუმზე ჩამოსულ ძალიან ბევრ ადამიანს ჩვენ გავუზიარებთ იმ შესაძლებლობებს, რომლებიც ჩვენს ქვეყანაშია. მინდა აღვნიშნო, რომ საქართველო „ბიზნესის კეთების რეიტინგში“ 189 ქვეყანას შორის მე-15 ადგილზეა, აღმოსავლეთ ევროპაში კი პირველ ადგილზე. რას ნიშნავს ეს ინვესტორებისთვის - იმას, რომ თავისუფლად შეუძლიათ ქვეყანაში შემოსვლა, ძალიან მარტვივად შეუძლიათ კომპანიის დარეგისტრირება და საბანკო ანგარიშის გახსნა. მინდა მოგახსენოთ, რომ ეს ასე არ ხდება ყველა ქვეყანაში და ჩვენ ამ მიმართუელბით ნამდვილად წარმატებულები ვართ ჩვენს რეგიონში და არამარტო აქ. ამასთან, ჩვენს ქვეყანაში არ ხორციელდება კონტროლი სავალუტო გადარიცხვებზე, არ არის შეზღუდვა კაპიტალის შემოტანაზე და გატანაზე, რაც ინვესტორებისთვის ძალიან მიმზიდველია.
აქვე მინდა აღვნიშნო, რომ ის სავაჭრო ხელშეკრულებები, რომლებიც ჩვენ გვაქვს ევროპასთან, დსთ-ს ქვეყნებთან და თურქეთთან, რეალური შესაძლებლობაა იმისთვის, რომ ქვეყანაში შეიქმნას ახალი სამუშაო ადგილები, ჩვენი მოსახლეობა დასაქმდეს, ადამიანებს ჰქონდეთ მაღალი და დამსახურებული ხელფასები. სწორედ ეს არის ის ბაზარი, სადაც უნდა იქნას გატანილი საქართველოში შექმნილი მომსახურებები და საქონელი. შესაბამისად, დღეს ჩვენ ყველაფერს გავაკეთებთ იმისთვის,რათა წარმოვაჩინოთ ჩვენი ქვეყნის მიმზიდველობა, ინვესტორებს და დაინტერესებულ პირებს ვაჩვენოთ, რომ რეალურად ჩვენს ქვეყანაში ფულის ინვესტირება ძალიან მომგებიანია - ამისი მაგალითი შარშანდელი წელია, როცა უცხოური პირდაპირი ინვესტიციების უპრეცედენტო მაღალი შემოდინება გვქონდა. ამ წლის პირველ ორ კვარტალში ჩვენ პირდაპირი უცხოური ინვესტიციების ასევე ძალიან მაღალი შემოდინება გვქონდა - 530 მილიონი დოლარი და ჩვენ ველოდებით, რომ აღნიშნული ტრენდი ასევე გაგრძელდება.
ასევე მინდა აღვნიშნო, რომ ჩვენს ქვეყანას საკმაოდ კარგი რეიტინგები აქვს სხვა მიმართულებებითაც - საქართველო თავისუფალია კორუფციისგან, აქ პრაქტიკულად არ არის კრიმინალი და ეს ყველაფერი ის ფონია, რომლის დროსაც ინვესტორს ქვეყანაში შემოსვლა და ახალი ბიზნესის დაწყება სურს.
„აბრეშუმის გზის ფორუმის“ შედეგად საქართველოს ბევრი პროექტი დარჩება, მათ შორის ხელი მოეწერება ტყიბულში 100 მილიონ დოლარზე მეტი საინვესტიციო ღირებულების პროექტის განხორციელებას. ჩვენ ასევე ვისაუბრეთ სატრანზიტო პოტენციალზე და ასევე იმ შესაძლებლობებზე, რომლებიც ტრანზიტმა უნდა მოიტანოს. ეს რა თქმა უნდა, ანაკლიის ღრმაწყლოვანი პორტია, რომელშიც ჯამურად რამდენიმე მილიარდიანი ინვესტიცია განხორციელდება. მინდა აღვნიშნო, რომ ანაკლიის პორტი თავისთავად განმხოლოებული სუბიექტი არაა - პორტის უკან 600 ჰექტარ ფართობს თავისუფალი ინდუსტრიული ზონა გაკეთდება, რომელიც ასევე დამატებით სამუშაო ადგილებს შექმნის. ჩვენ გვაქვს ძალიან კარგი კანონი თავისუფალი ინდუსტრიული ზონის შესახებ, მას, რა თქმა უნდა, დახვეწა სჭირდება, მაგრამ დღეს კანონი ადგილზეა და იმის შესაძლებლობას იძლევა, რომ საქართველოში მოხდეს პროდუქციის წარმოება და შემდეგ მისი ევროპაში შეტანა.
„თბილისის აბრეშუმის გზის ფორუმი“ ქართულ ბიზნესსაც ძალიან გამოადგება - ძალიან მნიშვნელოვანია ბიზნესის ბიზნესთან კავშირი. ფორუმები შესაძლებლობაა, სადაც ინტერესთა კონცენტრაცია ხდება. ეს პრინციპულად მნიშვნელოვანია, როდესაც კეთდება ორი მხრიდან დაინტერესებული პირების შეხვედრის ორგანიზება. შესაბამისად, ეს ფორუმი ბიზნესებისთვის ახალი კავშირების დამყარების და კონკრეტული გადაწყვეტილებების მიღების საშუალებაა, რომლებიც ხვალ-ზეგ ჩვენს ეკონომიკაზე აისახება“.
