საზღვარგარეთ საქართველოს დიპლომატიური წარმომადგენლობები აქტიურად მუშაობენ საქართველოს საინვესტიციო გარემოს პოპულარიზაციისა და საქართველოში უცხოური ინვესტიციების მოზიდვის მიზნით. - ამის შესახებ მთავრობის ანგარიშშია ნათქვამი, რომელიც პარლამენტში 11 სექტემბერს შევიდა.
ანგარიშში საუბარია საქართველოს საგარეო პოლიტიკურ ურთიერთობებზე. მასში ხაზგასმულია, რომ დღეისათვის ევროკავშირის წევრმა 24-მა ქვეყანამ მოახდინა საქართველოსა და ევროკავშირს შორის ხელმოწერილი ასოცირების შეთანხმების რატიფიცირება.
"აქტიურად და წარმატებით მიმდინარეობს მუშაობა საქართველოს საგარეო პოლიტიკის ყველა პრიორიტეტული მიმართულებით: ქვეყნის უსაფრთხოებისა და სუვერენიტეტის განმტკიცება; დეოკუპაცია და ტერიტორიული მთლიანობის აღდგენა; ქვეყნის ევროპული და ევროატლანტიკური ინტეგრაცია; ამერიკის შეერთებულ შტატებთან სტრატეგიული თანამშრომლობის გაღრმავება; მეზობელ და რეგიონის სახელმწიფოებთან ურთიერთობების განმტკიცება; რუსეთის ფედერაციასთან დაძაბული ურთიერთობების დეესკალაცია; თანამშრომლობა წამყვან საერთაშორისო ორგანიზაციებსა და პარტნიორ სახელმწიფოებთან, დემოკრატიული ინსტიტუტების განმტკიცების, კარგი მმართველობის; კანონის უზენაესობისა და ადამიანის უფლებათა დაცვის ხელშეწყობის მიზნით; მსოფლიოს სხვადასხვა რეგიონთან გლობალური პარტნიორობის განვითარება; ეკონომიკური დიპლომატია;
ინვესტიციების მოზიდვა; საზღვარგარეთ მყოფი საქართველოს მოქალაქეების უფლებების დაცვა და საზღვარგარეთ მცხოვრებ თანამემამულეებთან კონტაქტების განმტკიცება", - ნათქვამია ანგარიშში.
მასში არაღიარების პოლიტიკაზეც არის საუბარი. ანგარიშში აღნიშნულია, რომ მიმდინარეობს მუშაობა საერთაშორისო თანამეგობრობის ჩართულობის გაზრდის მიზნით.
"აღსანიშნავია, რომ 2015 წელს არც ერთ ქვეყანას არ უღიარებია აფხაზეთისა და ცხინვალის რეგიონების ე.წ. "დამოუკიდებლობა".
საქართველოს მთავრობა განაგრძობს ოკუპირებულ რეგიონებში არსებული მდგომარეობისა და რუსეთის მიერ ცეცხლის შეწყვეტის შეთანხმების დარღვევების განხილვას როგორც ჟენევის საერთაშორისო მოლაპარაკებების ფარგლებში, ასევე სხვა მრავალმხრივ ფორმატებში და პარტნიორ-სახელმწიფოებთან ორმხრივი შეხვედრების დროს.
მრავალმა ქვეყანამ და საერთაშორისო ორგანიზაციამ დაგმო რუსეთის მხრიდან ბოლოდროინდელი პროვოკაციული ნაბიჯები, კერძოდ ინტეგრაციის შესახებ ე.წ. "ხელშეკრულებების" ხელმოწერა და "საზღვრის აღმნიშვნელი" ბანერების დამონტაჟება", - ნათქვამია ანგარიშში.
Ø საქართველოს ხელისუფლება აქტიურად მუშაობს ქვეყნის სუვერენიტეტის განმტკიცებისა და ტერიტორიული მთლიანობის აღდგენის მიზნით.
"გრძელდება მუშაობა ოკუპირებულ რეგიონებში საერთაშორისო მონიტორინგის შექმნის, მათ შორის, ევროკავშირის სადამკვირვებლო მისიის მანდატის სრულყოფილი შესრულების უზრუნველსაყოფად. ამ თვალსაზრისით, აღსანიშნავია ევროპის საბჭოს მინისტრთა მოადგილეების კომიტეტის 12 მაისის გადაწყვეტილება, რომელიც მოუწოდებს რუსეთის ფედერაციას, უზრუნველყოს ევროპის საბჭოს სტრუქტურების შეუზღუდავი შესვლა საქართველოს კონფლიქტით დაზარალებულ ტერიტორიებზე.
ანგარიშში ასევე ნათქვამია, რომ მიმდინარე წელს, ქართული დიპლომატიის ძალისხმევის შედეგად, გაერო-ს გენერალური ასამბლეის ფარგლებში დევნილთა სტატუსის შესახებ რეზოლუციის მხარდამჭერთა რაოდენობა კიდევ ექვსით გაიზარდა (ჯამში 75 ქვეყანამ დაუჭირა მხარი).
,,საქართველოს მთავრობა აგრძელებს მუშაობას ომით დაშორიშორებულ მოსახლეობას შორის ნდობის აღდგენის პროექტების განხორციელების მიზნით:
ამ კუთხით, მიმდინარე წელს საერთაშორისო ორგანიზაციების, საქართველოში აკრედიტებული დიპლომატიური წარმომადგენლობებისა და სხვა დონორების დახმარებით, განხორციელდა მნიშვნელოვანი პროექტები.
2015 წლის იანვრიდან საგარეო საქმეთა სამინისტრომ დაიწყო ყოველკვარტალური ანგარიშების მომზადება საქართველოს ოკუპირებულ ტერიტორიებზე ადამიანის უფლებათა მდგომარეობის შესახებ საერთაშორისო თანამეგობრობის უკეთ ინფორმირების მიზნით", - ნათქვამია ანგარიშში.
მთავრობის ანგარიშის თანახმად, ევროპული და ევროატლანტიკური ინტეგრაცია - საქართველოს საგარეო პოლიტიკის ერთ-ერთ უმთავრეს პრიორიტეტს წარმოადგენს: საქართველოს წინსვლა ევროინტეგრაციის მიმართულებით დადებითად შეფასდა 21-22 მაისს რიგის სამიტზე და საქართველო წარმოჩინდა, როგორც "აღმოსავლეთ პარტნიორობის" ერთ-ერთი ლიდერი ქვეყანა.
"2014 წლის 1-ელ სექტემბერს, ასოცირების შეთანხმების დროებითი ამოქმედებით, საქართველო გადავიდა ევროკავშირთან ურთიერთობის თვისებრივად ახალ ეტაპზე და რეალურად დაიწყო ევროკავშირთან პოლიტიკური ასოცირებისა და ეკონომიკური ინტეგრაციის შრომატევადი და საპასუხისმგებლო პროცესი; საქართველოს ხელისუფლება ძალისხმევას არ იშურებს ასოცირების შეთანხმებით გათვალისწინებული ფართომასშტაბიანი რეფორმების გასატარებლად. ამ შეთანხმების ამოქმედებით, გაღრმავდა საქართველო-ევროკავშირის პოლიტიკური დიალოგი. შეიქმნა დიალოგის ახალი ინსტიტუციური ჩარჩო - ასოცირების საბჭო, ასოცირების კომიტეტები და დარგობრივი ქვეკომიტეტები; დღეისათვის ევროკავშირის წევრმა 24-მა ქვეყანამ მოახდინა საქართველოსა და ევროკავშირს შორის ხელმოწერილი ასოცირების შეთანხმების რატიფიცირება", - აღნიშნულია ანგარიშში.
ანგარიშში ნატო - საქართველოს კომისიის სხდომებზე და უელსის სამიტზე მიღებულ არსებით ღონისძიებათა პაკეტის განხორციელებაზეა საუბარი.
"შედეგად, წელიწადზე ნაკლებ დროში, მოხერხდა ნატო-საქართველოს ერთობლივი წვრთნისა და შეფასების ცენტრის გახსნა, რომელსაც ალიანსის გენერალური მდივანი იენს სტოლტენბერგი ესწრებოდა. მისი ვიზიტი კიდევ ერთი დადასტურებაა იმისა, რომ საქართველოს ალიანსის დღის წესრიგში მნიშვნელოვანი ადგილი უკავია. 2016 წელს, ვარშავის სამიტზე, ევროატლანტიკური ინტეგრაციის გზაზე საქართველოს მიერ მიღწეული პროგრესის სათანადოდ ასახვის მიზნით, წლის განმავლობაში აქტიური მუშაობა მიმდინარეობდა", - ნათქვამია ანგარიშში.
რაც შეეხება საქართველოს წვლილს გლობალური უსაფრთხოებისა და მშვიდობის განმტკიცების საქმეში, ანგარიშში ნათქვამია, რომ ქართული დანაყოფები მონაწილეობენ ნატო-ს ეგიდით მიმდინარე საერთაშორისო ოპერაციებში. საქართველო მომავალშიც გააგრძელებს საერთაშორისო თანამეგობრობის წინაშე არსებულ გამოწვევებთან, მათ შორის, საერთაშორისო ტერორიზმსა და ტრანსნაციონალურ ორგანიზებულ დანაშაულთან აქტიურ ბრძოლას, ასევე ენერგეტიკული უსაფრთხოების, შეიარაღებაზე კონტროლისა და გაუვრცელებლობის უზრუნველყოფის სფეროში საკუთარი წვლილის შეტანას.Ø
ანგარიშში ასევე საუბარია ორმხრივ ურთიერთობებზე ამერიკის შეერთებულ შტატებთან, როგორც საქართველოს მთავარ მოკავშირესთან. "მნიშვნელოვანია თავდაცვისა და უსაფრთხოების კუთხით აქტიური თანამშრომლობა, მათ შორის, ქვეყნის თავდაცვითი შესაძლებლობების განვითარების მიმართულებით. ამ მხრივ, აშშ-ის მიერ საქართველოსათვის განკუთვნილი დახმარება 20 მლნ. აშშ დოლარით გაიზარდა", - ნათქვამია ანგარიშში.
საქართველოს საგარეო პოლიტიკის ერთ-ერთი პრიორიტეტია მეზობელ სახელმწიფოებთან, აზერბაიჯანთან, თურქეთსა და სომხეთთან, ასევე შავი და კასპიის ზღვის რეგიონისა და ცენტრალური აზიის ქვეყნებთან მჭიდრო პოლიტიკური და ეკონომიკური ურთიერთობების განვითარება.
ანგარიშში საუბარია რუსეთთან ურთიერთობის შესახებ.
"მნიშვნელოვანი ამოცანაა რუსეთის ფედერაციასთან ურთიერთობების ნორმალიზება,
ამის საწინდარიც უნდა გახდეს რუსეთის მიერ საქართველოს ტერიტორიის დეოკუპაცია და ოკუპირებული რეგიონების დამოუკიდებლობის აღიარების გაუქმება.
გრძელდება არაფორმალური პირდაპირი დიალოგი საქართველოსა და რუსეთის სპეციალურ წარმომადგენლებს შორის. საქართველოს პრაგმატული მიდგომის შედეგად, შესაძლებელი გახდა პოზიტიური დინამიკის მიღწევა, რაც რუსეთთან სავაჭრო-ეკონომიკური ურთირთობების აღდგენას, შენარჩუნებას და გაფართოებას გულისხმობს.
ამასთან ერთად, პოზიტურად მიმდინარეობს კულტურულ-ჰუმანიტარული ურთიერთობების განვითარება.
ჩვენ მიერ ურთიერთობების ნორმალიზებისკენ გადადგმული ნაბიჯების მიუხედავად, რუსეთი კვლავ აგრძელებს უკანონო საქმიანობას საქართველოს ოკუპირებულ რეგიონებში, რაც გულისხმობს სოხუმსა და ცხინვალთან ინტეგრაციის შესახებ ე.წ. ხელშეკრულებების გაფორმებას, მცოცავ ანექსიას, საოკუპაციო ხაზის მიღმა მავთულხლართების, ხელოვნური ბარიერებისა და ე.წ. საზღვის აღმნიშვნელი ბანერების პერმანენტულ გადმოწევას ცენტრალური ხელისუფლების მიერ კონტროლირებული ტერიტორიის სიღრმეში", - ნათქვამია ანგარიშში.
ანგარიშში ასევე საუბარია სხვა ქვეყნებთან, მათ შორის ჩინეთთან თანამშრომლობაზე. 2015 წლის პირველი 7 თვის მონაცემებით, საქართველოდან ჩინეთში ექსპორტირებული საქონლის რაოდენობა წინა წლის 7 თვესთან შედარებით გაზრდილია დაახლოებით 55%-ით.
საქართველო-ჩინეთის ურთიერთობები თვისობრივად ახალ ეტაპზე გადადის, განსაკუთრებით ჩინეთის მიერ ინიცირებული "ახალი აბრეშუმის გზის" პროექტის კონტექსტში.
15-16 ოქტომბერს ქ. თბილისში გაიმართება "აბრეშუმის გზის თბილისის ფორუმი", სადაც გამოიკვეთება ახალი ინიციატივები, რომლებიც გულისხმობენ ჩინეთთან თანამშრომლობის გაღრმავებას 4 მიმართულებით: ტრანსპორტი, ენერგეტიკა, ვაჭრობა და ხალხთაშორისი ურთიერთობები.
ანგარიშში ასევე საუბარია ხარისხიანი განათლების ყველა საფეხურზე ხელმისაწვდომობის გაუმჯობესებაზე. ასევე, ნათქვამია, რომ 2015-2016 სასწავლო წელს 500 000-მდე მოსწავლე სრულად უზრუნველყოფილი იქნება სახელმძღვანელოებით,
"სასკოლო სახელმძღვანელოებით მოსწავლეების უზრუნველყოფის პროგრამამ გადაჭრა მოსწავლეების სასწავლო რესურსებთან წვდომის პრობლემა. 2013 წლიდან დღემდე პროგრამის ფარგლებში საჯარო სკოლების ყველა მოსწავლეს და კერძო სკოლის გარკვეულ კონტიგენტს 39,6 მლნ ლარის ღირებულების 1 მილიონამდე სასკოლო სახელმძღვანელოებისა და რვეულების სრული კომპლექტი უსასყიდლოდ გადაეცათ. 2015-2016 სასწავლო წელსაც 500 000-მდე მოსწავლე სრულად უზრუნველყოფილი იქნება სახელმძღვანელოებით", - ნათქვამია ანგარიშში.
მთავრობის ანგარიშის თანახმად, სასკოლო ავტობუსების მომსახურების შედეგად 2013 წლიდან სკოლების ფიზიკური ხელმისაწვდომობა და სასწავლო პროცესში ჩართულობა მნიშვნელოვნად გაიზარდა. პროგრამის დანერგვის შემდეგ სკოლაში მოსწავლეთა დასწრების მაჩვენებელმა 95%-ს გადააჭარბა. 2015 წლისათვის უკვე 1150 საჯარო სკოლაა ჩართული "საჯარო სკოლის მოსწავლეების ტრანსპორტით უზრუნველყოფის პროგრამის" ფარგლებში და ამ სერვისით 60 000-ზე მეტი მოსწავლე სარგებლობს.
ყოველწლიურად საჯარო სკოლის ყველა პირველკლასელს და იმ მოსწავლეებს, რომელთაც საბაზო საფეხური წარმატებით დაასრულეს, კომპიუტერული ტექნიკა გადაეცემათ. 2013 წლიდან მნიშვნელოვნად გაუმჯობესდა კომპიუტერების ტექნიკური მაჩვენებლები აღიჭურვა, ახალი ელექტრონული რესურსებით და საგანმანათლებლო პროგრამებით. 2015-2016 სასწავლო წელს 42 000 -მდე პირველკლასელი მიიღებს გაუმჯობესებული მახასიათებლის მქონე ახალი თაობის კომპიუტერს.
ანგარიშში პროფესიული განათლების ხელმისაწვდომობაზეც არის საუბარი.
"2013 წელს ქვეყანაში შექმნილი სოციალური მდგომარეობის გათვალისწინებით მთავრობამ სახელმწიფო სასწავლებლებში პროფესიული განათლების სრულად დაფინანსების გადაწყვეტილება მიიღო. 2013-2014 წლებში სახელმწიფო დაფინანსებით ისარგებლა 18 000-მდე სტუდენტმა, ხოლო 2015 წელს უკვე სარგებლობს 3000-ზე მეტი სტუდენტი. საშემოდგომოდ ნავარაუდევია 8000-მდე სტუდენტის მიღება.
მნიშვნელოვნად გაიზარდა პროფესიული განათლების დაფინანსება. 2013 წელთან შედარებით 2015 წელს ბიუჯეტი გასამმაგდა", - ნათქვამია ანგარიშში.
რაც შეეხება უმაღლეს განათლებაზე ხელმისაწვდომობას, უმაღლესი განათლების ხელმისაწვდომობის უზრუნველსაყოფად გაიცემა სახელმწიფო სასწავლო და სახელმწიფო სასწავლო სამაგისტრო გრანტები (ყოველწლიურად იხარჯება დაახლოებით 11 200 000 ლარი). მოქმედებს სახელმწიფო სტიპენდიების პროგრამა სტუდენტებისთვის. წინა წლებთან შედარებით გაორმაგდა სტიპენდიანტი სტუდენტების რაოდენობა, 2.6-ჯერ გაიზარდა დახარჯული თანხების მოცულობა;
წინა წლებთან შედარებით გასამმაგდება სოციალური პროგრამების ფარგლებში დაფინანსებული სტუდენტების რაოდენობა. ამ მიმართულებით დახარჯული თანხები 3,5 ჯერ გაიზარდა.
2013 წლიდან სახელმწიფო სრულად აფინანსებს 21 პრიორიტეტულ საბაკალავრო პროგრამას სახელმწიფო უმაღლეს საგანმანათლებლო დაწესებულებებში, რისთვისაც 2015 წელს გამოყოფილია 12 723 750 ლარი.
სახელმწიფოს დაფინანსებას იღებს მოქმედი სტუდენტების საერთო რაოდენობის 50% ზე მეტი.
ანგარიშში ასევე საუბარია სამეცნიერო-კვლევითი ინსტიტუტებზე. ანგარიშის თანახმად, 2015 წელს მხოლოდ კვლევითი ინსტიტუტების პროგრამულმა დაფინანსებამ შეადგინა 20,9 მლნ ლარი, რაც დაახლოებით სამჯერ მეტია წინა წლების დაფინანსებასთან შედარებით. მათ შორის მეცნიერ თანამშრომელთა ხელფასი საშუალოდ 2.5 ჯერ გაიზარდა.
ანგარიშში ასე საუბარია ახალი სკოლების და მშენებლობაზე და სკოლის შენობების რეაბილიტაციაზე.
რაც შეხება განათლების საერთაშორისო ცენტრს, რომელიც 2014 წელს პრემიერ-მინისტრის ინიციატივით შეიქმნა, ამ ეტაპზე ცენტრი ახორციელებს შემდეგ პროგრამებს: 1. საერთაშიროსო სამაგისტრო და სადოქტორო პროგრამა
2. საჯარო დაწესებულებაში დასაქმებულ პირთა კვალიფიკაციის ამაღლების პროგრამა.
"განათლების საერთაშორისო ცენტრმა 2014- სასწავლო წელს მსოფლიოს წამყვან უნივერსიტეტებში სამაგისტრო და სადოქტორო პროგრამებზე სწავლის მსურველი 77 წარმატებული ახალგაზრდა დააფინანსა, ხოლო 2015 წელს კი 115 ბენეფიციარი ჰყავს. სულ მალე მათი ნაწილი - სამაგისტრო და სადოქტორო პროგრამების კურსდამთავრებულები საქართველოში დაბრუნდებიან და შესაბამის სფეროში მოღვაწეობას გააგრძელებენ. კურსდამთავრებულთა ყველაზე წარმატებულ ნაწილს სახელმწიფო დასაქმებაში შეუწყობს ხელს", - ნათქვამია მთავრობის ანგარიშში.
პარლამენტში შესული მთავრობის ანგარიში 90-გვერდიანია.
