პურზე ფასის ზრდა გარდაუვალია, - ამაზე განცხადებას პურის მწარმოებლები აკეთებენ. მათი განმარტებით, თუ პურის ფასმა არ მოიმატა, პურის წარმოებას სერიოზული პრობლემები შეექმნება და შეიძლება, ზოგიერთმა მუშაობაც კი შეაჩეროს.
” საგრძნობლად მოიმატა პურის ფასმა, ბოლო პერიოდში სადღაც 7 ლარით არის ფქვილის ფასი გაზრდილი. ბუნებრივია ამან გამიძვირა ხარჯი. პროდუქციის ფასს კი ამ ეტაპზე ვერ ვამატებ. ვინაიდან ისედაც მცირეა რეალიზაცია და თუ მსხვილი კომპანიების მიერ არ აიწია ფასი მე ფასს არ ავწევ. მიწევს ზარალზე მუშაობა და სანახევრად გაჩერებული ვარ და შეიძლება საერთოდ გავჩერდე”, - აცხადებს შპს ”იბერია 2012”-ის ხელმძღვანელი გივი გორგიაშვილი.
შპს ”პური ჩვენი არსობისას” ხელმძღვანელი ომარ ფურცელაძეც პურზე ფასის მატებაზე საუბრობს. მისი თქმით, თუ ფქვილის ღირებულება არ დაიაფდება და ელქტროენერგიაზე ფასი მოიმატებს, პური აუცილებლად გაძვირდება.
პროდუქტზე ფასის მატებასთან დაკავშირებით, საბოლოო გადაწყვეტილებას მწარმოებლები სოფლის მეურნეობის მინისტრთან შეხვედრის მერე მიიღებენ.
სოფლის მეურნეობის მინისტრის ოთარ დანელიას თქმით, საქართველოში ხორბლის ძალიან მაღალი მოსავალია, ამას ემატება საერთაშორისო ბაზარზე ხორბლის გაიაფებაც, რაც მეტყველებს იმაზე, რომ ფქვილის გაძვირების მიზეზი არ არსებობს.
” საქართველოში არის ძალიან მაღალი მოსავალი ხორბლის, მესმის, რომ ეს ცალსახად სასურსათო დანიშნულებისა ვერ იყოს, მაგრამ შერევისთვის ეს არის მისაღები ხარისხი. პლუს ამას ემატება ხორბლის ფასის გაიაფება. საერთაშორისო ხორბალი ყველგან გაიაფებულია. შესაბამნიდსად, ფქვილის ფასის მატების ლოგიკა არ არსებობს”, - განაცხადა მინისტრმა.
იგი ასევე გამოეხმაურა კომპანია იფქლის წარმომადგენლების განცხადებას სამინისტროს წარმომადგენლებთან შეხვედრასთან დაკავშირებით და აღნიშნა, რომ ინფორმაცია იმის თაობაზე, რომ შეხვედრაზე მათი მხრიდან უარი ითქვა არასწორია. სოფლის მეურნეობის მინისტრმა ჟურნალისტებთან აღნიშნა, რომ ისინი კომპანიის წარმომადგენლებს სავარაუდოდ მომდევნო კვირას შეხვდებიან.
