უფლებადამცველი მერაბ ბლადაძე აფხაზ ახალგაზრდებს გამბედაობას უწონებს და ხელისუფლებას ინიციატივით მიმართავს.
„საბედნიეროდ, აფხაზეთის თვითგამოცხადებული რესპუბლიკის პარლამენტშიც არიან საღად მოაზროვნეები, რომლებიც აფხაზი ახალგაზრდების თბილისში, სუპერთასის მატჩზე დასწრებას ამართლებენ და ე.წ. რადიკალებს თავის შეკავებისკენ მოუწოდებენ,“ - აცხადებს უფლებადამცველი მერაბ ბლადაძე, რომესლაც სოხუმთან გარკვეული პირადი კავშირები აქვს.
ბლადაძის თქმით, აფხაზმა ახალგაზრდებმა, „ფეისბუქით“, თბილისიდან სოხუმში ერთგვარი „პირდაპირი ჩართვა“ განახორციელს.
„ისინი სოციალურ ქსელში წერდნენ: „ჩვენ თბილისში ვართ, სტადიონზე... შარდენზე... არავინ გვეხება, არ უკვირთ ჩვენი ჩამოსვლა“. ამის გამო, ე.წ. აფხაზეთის პარლამენტის ნაწილმა, როგორც იტყვიან, ყველაფერი თავზე დაიმხო და ხშირად იმეორებდნენ სტყვებს: „მტრის ტერიტორიაზე", „საომარ მდგომარეობა“, „ომში დაღუპულები საფლავში ტრიალებენ... ასეა თუ ისე, ნავსი გატყდა და ჩვენ თუ ვერა, საერთო ენას აფხაზი და ქართველი ახალგაზრდები მაინც გამონახავენ და, საბოლოოდ, ისევ ერთად ვიქნებით,“ - აცხადებს მერაბ ბლადაძე.
ამასთან, უფლებადამცველი ხელისუფლების დიდ წარმატებად თვლის აფხაზებისთვის უფასო სამედიცინო მომსახურების პროგრამის შემოღებას და გამოდის ინიციატივით, რომ ჯანდაცვის სამინისტროში სპეციალური სამსახური შეიქმნას, რომელსაც თავისი საიტიც ექნება და რომლითაც აფხაზები და ოსები ჯანდაცვის სამინისტროს პირდაპირ დაუკავშირდებიან.
„ახლა ყველაფერი ეს „ჩერეზ“ ნაცნობობით ხდება,“ - აცხადებს მერაბ ბლადაძე.
