ექსპერტი ხათუნა ლაგაზიძე მიიჩნევს, რომ აშშ-ში საქართველოს ორი დელეგაციის გამგზავრების თაობაზე კამათი, სამარცხვინოა. მისი თქმით, ლარის ვარდნის პირობებში, საქართველოს მოსახლეობამ თავად უნდა გადაწყვიტოს, ვინ უფრო იაფი დაუჯდება ქვეყანას.
,,აღარაფერს ვამბობ იმაზე, რომ ამაზე კამათი უკვე სამარცხვინოა, აღარც კონსტიტუციაზე და აღარც მორალზე! შემომაქვს წინადადება: პრეზიდენტის და პრემიერის ადმინისტრაციებმა წარმოადგინონ იმ ხარჯების სავარაუდო სია, რაც მათი აშშ-ში ვიზიტები დაუჯდება საქართველოს ბიუჯეტს, თანმხლები პირების, მგზავრობის, განთავსების და ა.შ. ხარჯების ჩათვლით. მერე საქართველოს მოსახლეობამ გადაწყვიტოს, ვინ უფრო იაფი დაუჯდება ქვეყანას ამ გაგანია ლარის კურსის ვარდნის პირობებში და ვის უფრო მაღალი პასუხისმგებლობა აქვს საკუთარი საზოგადოების წინაშე”! - აცხადებს ლაგაზიძე.
შეგახსენებთ, ნიუ იორკში, გაერო-ს გენერალურ ასამბლეაზე საქართველოდან სავარაუდოდ ორი დელეგაცია გაემგზავრება. პრემიერ-მინისტრი ასამბლეაზე სიტყვით გამოვა, პრეზიდენტი კი, ასამბლეის თანმდევ ღონისძიებაზეა მიწვეული, რომელსაც ლიტვა ატარებს.
მთავრობის ადმინისტრაციამ გუშინ გაავრცელა ინფორმაცია, რომ საქართველოს პრემიერ-მინისტრი ირაკლი ღარიბაშვილი სექტემბრის ბოლოს ამერიკის შეერთებულ შტატებში მიემგზავრება. ირაკლი ღარიბაშვილი ნიუ იორკში გაეროს გენერალურ ასამბლეის 70-ე სესიაზე სიტყვით გამოვა. ამერიკის შეერთებულ შტატებში ვიზიტის ფარგლებში დაგეგმილია, როგორც ორმხრივი, ისე გაფართოებული შეხვედრები.
საქართველოს პრეზიდენტის ადმინისტრაციის ცნობით კი, პრეზიდენტი გიორგი მარგველაშვილი ლიტველმა კოლეგამ დალია გრიბაუსკაიტემ ნიუ იორკში დაგეგმილ დისკუსიაზე "აღმოსავლეთ ევროპის მომავალი: ქალთა როლის გაძლიერება" მიიწვია.
