საპარლამენტო ფრაქცია "ქართული ოცნების" თავმჯდომარე გია ვოლსკინიუ იორკში, გაერო-ს გენერალურ ასამბლეაზე საქართველოდან ორი დელეგაციის გამგზავრების საკითხს გამოეხმაურა. ტელეკომპანია "იმედის" ეთერში მან განაცხადა, რომ ორი მაღალი დონის დელეგაციის გამგზავრება, მოუხერხებელია.
"ეტყობა პრეზიდენტის ოფისში კარგად ვერ გაიგეს, ასეთ შემთხვევებში, რას ნიშნავს პროტოკოლი. დელეგაციის შემადგენლობისა და მეთაურის შესახებ გადაწყვეტილებას, მთავრობა იღებს. საკმაოდ მოუხერხებელია ორი მაღალი დონის დელეგაციის გამგზავრება, არის ზედმეტი დანახარჯიც, მაგრამ არის ღონისძიებები, რომელიც მნიშვნელოვანია. საპროტოკოლო უხერხულობას შეიძლება თავი ავარიდოთ, პრეზიდენტის დელეგაცია ცალკე იქნება, პრემიერის დელეგაცია გაერო-ს გენერალური ასამბლეაზე გაემგზავრება",- აღნიშნა გიორგი ვოლსკიმ.
შეგახსენებთ, ნიუ იორკში, გაერო-ს გენერალურ ასამბლეაზე საქართველოდან სავარაუდოდ ორი დელეგაცია გაემგზავრება. პრემიერ-მინისტრი ასამბლეაზე სიტყვით გამოვა, პრეზიდენტი კი, ასამბლეის თანმდევ ღონისძიებაზეა მიწვეული, რომელსაც ლიტვა ატარებს.
მთავრობის ადმინისტრაციამ გუშინ გაავრცელა ინფორმაცია, რომ საქართველოს პრემიერ-მინისტრი ირაკლი ღარიბაშვილი სექტემბრის ბოლოს ამერიკის შეერთებულ შტატებში მიემგზავრება. ირაკლი ღარიბაშვილი ნიუ იორკში გაეროს გენერალურ ასამბლეის 70-ე სესიაზე სიტყვით გამოვა. ამერიკის შეერთებულ შტატებში ვიზიტის ფარგლებში დაგეგმილია, როგორც ორმხრივი, ისე გაფართოებული შეხვედრები.
საქართველოს პრეზიდენტის ადმინისტრაციის ცნობით კი, პრეზიდენტი გიორგი მარგველაშვილი ლიტველმა კოლეგამ დალია გრიბაუსკაიტემ ნიუ იორკში დაგეგმილ დისკუსიაზე "აღმოსავლეთ ევროპის მომავალი: ქალთა როლის გაძლიერება" მიიწვია.
