ზურაბ ჟვანიას საქმეზე მსჯავრდებულების ადვოკატის ბექა ბასილაიას განცხადებით, ვერდიქტის გამოტანისას, ნაფიცმა მსაჯულებმა გარკვეული გარემოებები მხედველობაში არ მიიღეს.
„ნაფიც მსაჯულთა სასამართლოს გადაწყვეტილებას, როგორც საზოგადოების წევრთა მიერ გამოტანილ გადაწყვეტილებას, პატივს ვცემთ. თუმცა, სამწუხაროა, რომ ნაფიცმა მსაჯულებმა მთელი რიგი გარემოებები არ მიიღეს მხედველობაში. დარწმუნებული ვარ, ნაფიც მსაჯულთა შორის ზურაბ ჟვანია რომ ყოფილიყო, ამ საქმეზე გამამართლებელი ვერდიქტი დადგებოდა“, - განაცხადა ბასილაიამ.
ცნობისთვის, ნაფიცმა მსაჯულებმა მიხეილ ძაძამიას და დაცვის უფროსს კობა ხარშილაძეს გამამტყუნებელი ვერდიქტი გამოუტანეს. დახურულ თათბირზე კი მოსამართლეს შემამსუბუქებელი რეკომენდაციით მიმართეს.
ძაძამიას სასჯელი 8 თვითა და 23 დღით განესაზღვრა, რაც მას უკვე მოხდილი აქვს, ამიტომ იგი სასამართლო დარბაზიდან წუხელვე გათავისუფლდა. რაც შეეხება, კობა ხარშილაძეს, მას პატიმრობაში ყოფნა რამდენიმე თვეს მოუწევს. იგი სასჯელს სხვა, კერძოდ ე.წ. გრინსერვისის საქმეზე იხდის. ხარშილაძეს ჟვანიას საქმეზე სასჯელის ვადად 1 წელი და 9 თვე განესაზღვრა.
