საქართველოს სოფლის მეურნეობის მინისტრი ოთარ დანელია პურზე ფასის მატებას ალოგიკურად მიიჩნევს. მისი განცხადებით, საქართველოს ხორბლის მარაგიც აქვს და ზოგადად ბაზრებზე ხორბალიც გაიაფებულია.
"არც ერთ ლოგიკას არ ექვემდებარება, ხორბლის ან პურის ფასის მატება, შესაბამისად ჩვენს ხელთ არსებული ყველა მეთოდი უნდა გამოვიყენოთ, რომ ამის პრევენცია მოხდეს. თუ რამე ხელშეწყობაა საჭირო სახელმწიფო მხრიდან, ჩვენ ამ დარგს ხელს შევუწყობთ, მაგრამ ლოგიკას ნამდვილად არ ექვემდებარება. ჩვენ დეტალურად ვსწავლობთ, თუ რაშია საქმე",- განაცხადა დანელიამ და დასძინა, რომ წისქვილკომპინატებს აქვთ პრობლემები და მათი მოგვარება მაქსიმალურად დაჩქარებულ ვადებში უნდა მოხდეს.
შეგახსენებთ, ”ჯი-ეიჩ- ენს” შპს ”იფქლის” და პურპროდუქტების ასოციაციის ხელმძღვანელებმა განუცხადეს, რომ პურის ღირებულებაზე გავლენას ფქვილზე ფასის მატებას მოახდენს.
” პურის ფასს ვერ შევინარჩუნებთ სამწუხაროდ. სექტემბრამდე თუ მოვახერხებთ დიდი საქმე იქნება. თუკი ფქვილის ფასი არ დარეგულირდა და დარჩება ის რაც არის დღეს, პურს აუცილებლად ფასი მოემატება. დაახლოებით 10 თეთრით გაძვირდება. ამის მიზეზი არის ის, რომ 10 ივნისიდან დღემდე ერთი ტომარა ფქვილის ფასი გაიზარდა 37 ლარიდან 44 ლარამდე. ეს არის ძალიან ბევრი. გავლენას იქონიებს დენის ტერიფის მატებაც. ამას ემატება ლარის გაუფასურებაც, თუკი ასე გაგრძელდება, რა მოყვება ამ ყველაფერს არ ვიცი”, _ აღნიშნა შპს ”იფქლის” გენერალური დირექტორმა შაქრო ბაკურაძემ.
ფასის მატებას არც პურპროდუქტების ასოციაციის თავმჯდომარე მალხაზ დოლიძე გამორიცხავს. მისი თქმით, ფასების ზრდა უკვე შინიშნება და თუკი კონკრეტული ნაბიჯები არ გადაიდგა პურის გაძვირება გარდაუვალია.
