,,სამართლიანი არჩევნების” დირექტორის ნინო ლომჯარიას შეფასებით, რუსთავი 2 -ის თემა პოლიტიზებას ვერ აცდება. მისი განმარტებით, ეს არის ყველაზე რეიტინგული ტელეარხი, რომლის სარედაქციო პოლიტიკის მიმართ ხელისუფლებას არაერთხელ ჰქონია პრეტენზიები.
,,რაც უნდა სამართლებრივ სიბრტყეში ვისაუბროთ ამ საკითხის გარშემო, მაინც ვერ ავცდებით ამ თემის პოლიტიზირებას და იმას, რომ ამ პროცესს აუცილებლად ექნება პოლიტიკური ეფექტი. რუსთავი 2 არის რეალურად ყველაზე რეიტინგული ტელეარხი, რომელიც არის კრიტიკულად განწყობილი ხელისუფლების მიმართ და მისი სარედაქციო პოლიტიკის მიმართ ხელისუფლებას არაერთხელ ჰქონია პრეტენზიები. საჭიროა გაძლიერდეს სასამართლო გადაწყვეტილებებზე საზოგადოებრივი მონიტორინგი”, - განაცხადა ლომჯარიამ.
საქალაქო სასამართლოს 5 აგვისტოს გადაწყვეტილებით, რუსთავი 2-ის ქონება სრულად დაყადაღებულია. ყადაღა დაედო შპს სამაუწყებლო კომპანია რუსთავი 2-ის მფლობელთა წილებს. არხის მეწილეებს აკერძალათ ტელეკომპანიის სახელით ვალდებულებების აღება, რეორგანიზაცია, წესდებაში ცვლილებების შეტანა, საზოაგდოების საკუთრებაში არსებული ქონების განკარგვა. ასევე, დაყადაღებულია რუსთავი 2-ის სახელზე გაფორმებული ქონება.