დარგობრივი ეკონომიკისა და ეკონომიკური პოლიტიკის საპარლამენტო კომიტეტის თავმჯდომარის ზურაბ ტყემალაძის შეფასებით, ლარის გაუფასურებაზე გავლენა ”ეროვნული ბანკის შესახებ“ კანონში ცვლილებების შეტანისას გამოწვეულმა აჟიოტაჟმა მოახდინა. კერძოდ, საქართველოს პრეზიდენტის, გიორგი მარგველაშვილის მიერ ვეტოს დადებამ და კანონპროექტის მიღების გაჭიანურებამ.
,,ჯი-ეიჩ-ენის” კითხვაზე, რატომ არ გამართლდა მისი პროგნოზი ტურისტულ სეზონზე ლარის გამყარებასთან დაკავშირებით, დეპუტატმა განაცხადა, რომ ეს უკავშირდება სებ-ის შესახებ კანონპროექტთან დაკავშირებულ მოვლენებს.
”მინდა გითხრათ, რომ ლართან დაკავშირებით აჟიოტაჟი კიდევ არ ჩამცხრალა. ლარის კურსზე არ შეიძლება ნებისმიერი ზეგავლენის, ნებისმიერი აჟიოტაჟის მოხდენა. ეს ეხება კანონპროექტთან დაკავშირებულ მოვლენებს. ნებსმიერი ვეტო, ნებისმიერი გახანგძლივებული კანონის მიღება და ა.შ ბუნებრივია გარკვეულ წილად უწყობს ხელს ქაოსს და ქაოტურ მდგომარეობას, რაც ლარის გაუფასურების ერთ- ერთი ხელშემწყობი ფაქტორია”, - განაცხადა ტყემალაძემ.
მისივე თქმით, უცხოურ ვალუტასთან მიმართებაში ლარის გაუფასურება ეროვნული ბანკის მიერ არასაკმარისი ღონისძიებების ჩატარებამაც განაპირობა.
მან ”ჯი-ეიჩ-ენთან” საუბრისას სავარაუდო პროგნოზიც გააკეთა და აღნიშნა, რომ ლარის დასტაბილურებას სექტემბერში უნდა ველოდოთ.
შეგახსენებთ, ზურაბ ტყემალაძე რამდენიმე თვის წინ აცხადებდა, რომ ტურისტული სეზონი ლარის კურსის გამყარებას ხელს შეუწყობს.
ლარი უცხოურ ვალუტასთან მიმართებაში გაუფასურებას განაგრძობს. ბოლო მონაცემებით, ოფიციალური კურსით, 1 აშშ დოლარი/2.3044 ლარია, ხოლო 1 ევრო/2.5132 ლარი.
