დღეს გაირკვევა შეასრულებს თუ არა სასამართლო ხელისუფლება ბიძინა ივანიშვილის დაკვეთას, - ამის შესახებ ,,ნაციონალური მოძრაობის აღმასრულებელი მდივანი სერგო რატიანი აცხადებს.
თბილისის საქალაქო სასამართლო სავარაუდოდ, დღეს გადაწყვეტს, მიიღებს თუ არა წარმოებაში ტელეკომპანია „რუსთავი 2“-თან დაკავშირებით, ბიზნესმენ ქიბარ ხალვაშის სარჩელს.
,,დღეს გაირკვევა შეასრულებს თუ არა სასამართლო ხელისუფლება ბიძინა ივანიშვილის დაკვეთას და მოხდება თუ არა ამ რეპრესიული მანქანის ჩართვა და ღონისძიებების გატარება რუსთავი 2-ის წინააღმდეგ. საფრთხის ქვეშ დგას სიტყვის თავისუფლება და დემოკრატიის განვითარება," - განმარტავს სერგო რატიანი.
ხალვაში ტელეკომპანიაში წილის დაბრუნებას ითხოვს. სარჩელის უზრუნველყოფის მიზნით, მან ტელეკომპანიაში პარტნიორთა წილების დაყადაღება მოითხოვა, რაც მოსამართლემ დააკმაყოფილა.
როგორც ტელეკომპანიის წარმომადგენლები აცხადებენ, სასამართლოს ოფიციალურ განჩინებასთან დაკავშირებული მასალები „რუსთავი 2“-სთვის ამ დრომდე არ გადაუცია.
ტელეკომპანიას სამი მოთხოვნა აქვს - მოსამართლე ურთმელიძე არ იყოს საჩივრის განმხილველი; საზოგადოების მაღალი ინტერესის გამო, საჩივარი იყოს განხილული ზეპირი მოსმენით; განხილვა მოეწყოს არა ერთი, არამედ სამი მოსამართლით;
სასამართლოს გადაწყვეტილებით, „რუსთავი 2“-ის ქონება დაყადაღებულია. აღნიშნული გადაწყვეტილება მოსამართლემ ბიზნესმენ ქიბარ ხალვაშის სარჩელის საფუძველზე მიიღო.
