ექსპერტი ეკონომიკის საკითხებში დემურ გიორხელიძე მიიჩნევს, რომ უცხოურ ვალუტასთან მიმართებაში, ლარის გაუფასურება გაგრძელდება. მისი განმარტებით, ქვეყანაში არანაირი ფაქტორები არ არის განვითარების იმ ეტაპზე, რომ ლარის დაჭერა - დასტაბილურება მოხერხდეს.
,,ის, რაც საფუძვლად უდევს ლარის სისუსტეს, არ უმჯობესდება, ამიტომ, ეს პროცესი გაგრძელდება. ეკონომიკა არის უმძიმეს მდგომარეობაში - ეკონომიკური აქტიურობა იკლებს. გარე ფაქტორები არ უმჯობესდება, საშინაო მით უფრო არ უმჯობესდება. ლარს არ გააჩნია საყრდენი, რომელზე დაყრდნობით იგი შეიძლება მეტ ნაკლებად სტაბილური იყოს, თუ ამას დავუმატებთ ეროვნული ბანკის მავნებლურ პოლიტიკას.. ეს ყველაფერი გაგრძელდება მანამ, სანამ ხელისუფლებას არ ეყოფა პოლიტიკური პასუხისმგებლობა, რომ სახელმწიფო მექანიზმები გამოიყენონ საკუთარი ხალხის დაცვისათვის და არ იქნას გამოყენებული არალობირებული, კერძო ბიზნესის დამხობისათვის” - განაცხადა ”ჯი-ეიჩ-ენთან” დემურ გიორხელიძემ.
მისი თქმით, ლარის კურსზე ვერც ტურისტული სეზონი იქნება ასახული და ასეთი მოლოდინები გიორხელიძის შეფასებით, ეკონომიკურ თეორიაში სრულ უვიცობაზე მიანიშნებს.
,,რაც შეეხება ტურისტების მატებას.. რა შუაშია? როგორ შეიძლება რაღაც რაოდენობის ვიზიტორი შემოვიდეს და ქვეყანამ კარგად იგრძნოს თავი. ე.წ ექპერტების, ანალიტიკოსების ეს მლიქვნელური და ხელისუფლების საამებელი კომენტარები მიანიშნებს მათ სრულ უვიცობას ეკონომიკური თეორიული ცოდნისას და ფინანსური თეორიის ცოდნისას. რა თქმა უნდა, ტურისტების მატებას მცირედითაც ვერ ვიგრძნობთ , რადგან ეს არ არის ისეთი ფაქტორი, რომლითაც შეიძლება ქვეყნის ეკონომიკა წელში გასწორდეს”, _ აცხადებს დემურ გიორხელიძე.
შეგახსენებთ, ლარი უცხოურ ვალუტასთან მიმართებაში გაუფასურებას განაგრძობს. ბოლო მონაცემებით, ოფიციალური კურსით, 1 აშშ დოლარი/2.3044 ლარია, ხოლო 1 ევრო/2.5132 ლარი.
