სახელმწიფო დაცვის სპეციალური სამსახურის ყოფილი ხელმძღვანელის თემურ ჯანაშიას განცხადებით, ძაძამია ვერ ჩაითვლება პირად, ვისაც უნდა უზრუნველეყო ზურაბ ჟვანიას უსაფრთხოება. ამის შესახებ მან ყოფილი პრემიერის საქმეზე, ნაფიცი მსაჯულების პირობებში სასამართლოსთვის ჩვენების მიცემის შემდეგ განაცხადა.
მისივე თქმით, კანონში არაფერი წერია დასაცავი პირის უბედური შემთხვევებისგან დაცვის შესახებ.
,,ამ შემთხვევაში ჩვენ არ გვაქვს საქმე დაცვითი ღონისძიებების ჩატარებასთან, იმიტომ, რომ ბატონმა ზურაბ ჟვანიამ დაცვის სრული შემადგენლობა იმ გადაადგილებამდე დაითხოვა. შესაბამისად, ძაძამია ვერ ჩაითვლება პირად, ვისაც უნდა უზრუნველეყო პრემიერ-მინისტრის უსაფრთხოება. სახელმწიფო დაცვის სპეციალურ სამსახურის შესახებ კანონში ერთადერთი ჩანაწერი არის ის, რომ დაცვამ პირი მართლსაწინააღმდეგო ქმედებისგან უნდა დაიცვას. კანონში არაფერი წერია დასაცავის პირის დაცვის შესახებ შემთხვევებისგან. ბუნებრივია შემთხვევებისგან ვერავინ დაიცავს დასაცავ პირს", - განმარტა თემურ ჯანაშიამ.
იგი მიიჩნევს, რომ ჟვანიას საქმით, პოლიტიკოსები ქულების დაწერას ცდილობენ.
