ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრის ინფორმაციით, რკინიგზის აფხაზეთის მონაკვეთის აღდგენასთან დაკავშირებით არავითარი მოლაპარაკება არ მიმდინარეობს. საოკუპაციო ძალების მიერ, რკინიგზის აფხაზეთის მონაკვეთზე დასუფთავების დაწყების ფაქტთან დაკავშირებით, სოზარ სუბარმა ჟურნალისტებთან განაცხადა, რომ ამ ქმედებას საქართველო ვერ აკრძალავს.
„ავუკრძალოთ რკინიგზის დასუფთავება? თუ ისინი ასუფთავებენ, ვერ ავუკრძალავთ. თუ ისინი არემონტებენ, რაღაცას აკეთებენ, ამასაც ვერ ავუკრძალავთ. თუ თქვენ გაინტერესებთ, არის თუ არა დღის წესრიგში აფხაზეთის მიმართულებით რკინიგზის აღდგენა და ხდება თუ არა რაიმე მოლაპარაკება აფხაზებთან, რუსებთან, სომხებთან ან ვინმე სხვასთან, მსგავსი არ ხდება და ზოგადად, იდეაში, რომ დაიწყოს ლაპარაკი ამაზე, ჩვენ ტაბუებიდან კი არ უნდა ამოვიდეთ - რომ გამორიცხულია, არ უნდა აღდგეს და ა.შ., არამედ, უნდა დავიწყოთ შესწავალა, თუ ვის ინტერესებშია ეს - რუსეთის ინტერესებშია, ჩვენს ინტერესში თუ სხვა. ყველაფერი უნდა გავაკეთოთ, რაც ჩვენს ინტერესშია. მაგრამ, ამ წუთში საერთოდ არ არსებობს ეს თემა”, - განაცხადა სუბარმა.
შეგახსენებთ, რუსულმა საოკუპაციო ძალებმა აფხაზეთში რუსეთ-საქართველოს დამაკავშირებელი სარკინიგზო მაგისტრალის დასუფთავება დაიწყეს. დაახლოებით 800 სამხედროსგან შემდგარი ჯგუფი ოჩამჩირიდან ენგურამდე არსებულ მონაკვეთს ასუფთავებს. აფხაზეთის რკინიგზის ეგრეთ წოდებული სამმართველოს დირექტორის მოადგილის იგორ მარღანიას თქმით, სამხედროები ამ მონაკვეთის დასუფთავების შემდეგ მის აღდგენას დაიწყებენ.
რუსი სამხედროების მიერ რკინიგზის დასუფთავების ფაქტს ადასტურებს აფხაზეთის ეგრეთ წოდებული ტრანსპორტის სახელმწიფო სამმართველოს ხელმძღვანელი ზურაბ ხაჯიმბა, ამასთან, ხაჯიმბა ამბობს, რომ აფხაზეთში სამხედროები მოულოდნელად გამოჩნდნენ. "ჩვენი მხრიდან ამ საკითხზე არანაირი ნებართვა არ გაცემულა", - აღნიშნა მან, თუმცა დასძინა, რომ აფხაზურმა მხარემ მოსამზადებელი სამუშაოების ჩატარებაზე ნებართვა გასცა.
აფხაზეთის რკინიგზა ომის შემდგომ პრაქტიკულად ამორტიზებულია, რუსულმა საოკუპაციო ძალებმა რკინიგზის გარკვეული მონაკვეთების შეკეთება რამდენიმე წლის წინ დაიწყეს.