ოკუპირებული ტერიტორიების მიმდებარედ საზღვრის გადმოწევის პროცესი გაგრძელდება. ამის შესახებ „ჯი-ეიჩ-ენს“ საგარეო საქმეთა მინისტრის ყოფილმა მოადგილემ, კონსტიტუციონალისტმა ნიკოლოზ ვაშაკიძემ განუცხადა.
„ცხადია, ეს პროცესი გაგრძელდება და გაგრძელდება სწორედ ისე, როგორც მიმდინარეობს აქამდე, ანუ, ნაწილ-ნაწილ, იმის მიხედვით, თუ როდის ჩათვლის საჭიროდ მოსკოვი, რომ მორიგი საზღვრის გადმოწევა-დაფიქსირებით კიდევ ერთხელ აუწიოს ყური საქართველოს ხელისუფლებას ან აჟიოტაჟი და არეულობა შემოიტანოს ჩვენს პოლიტიკურ ცოვრებაში“, - განაცხადა ვაშაკიძემ.
მისი თქმით, ხელისუფლება ლამის "კანონიერად" აცხადებს ოკუპანტის მოქმედებას და ხელს სააკაშვილისკენ იშვერს.
„როგორც გახსოვთ, ამ მოვლენის შეფასება ხელისუფლების მხრიდან მდგომარეობდა იმაში, რომ ეს არის ე.წ. სააკაშვილის მემკვიდრეობის გარდაუვალი შედეგი და ლამის „კანონიერი“ ქმედება, რაშიც განსაკუთრებული არაფერი არ არის. ასე რომ, ძნელი მისახვედრი არაა, რომ ასეთი მიდგომის პირობებში პროცესის მინიმალიზაციის კუთხით ხელისუფლება პრაქტიკულად არაფერს მოიმოქმედებდა“, - განაცხადა ნიკა ვაშაკიძემ.
მან ასევე აღნიშნა, რომ ოკუპირებულ ტერიტორიებთან და ბორდერიზაციის პროცესის შეჩერებასთან დაკავშირებით ხელისუფლებას არანაირი გეგმა არ გააჩნია.
„ვერანაირ გეგმას ვერ ვხედავ. არსებობს მხოლოდ დილეტანტური და სამზარეულოს დონის პოლიტიკური მიდგომა, „დათვს ბაბაია დაუძახე“-ს ტიპის. რეკომენდაციებს და ჩევებს მე ხელისუფლებას კარგა ხანია აღარ ვაძლევ, რადგან ამას არანაირი აზრი არ აქვს. რჩევის მიცემას მხოლოდ იმისთვის აქვს აზრი, ვისაც ამ რჩევის გაგების და შერულების უნარი გააჩნია. ამის პოტენციალს დღევანდელ ხელისუფლებაში ვერ ვხედავ. ერთადერთი, რაც მინდა მას ვურჩიო, არის ის, რომ მან რამენაირად, არეულობის გარეშე, მიიყვანოს ქვეყანა და სახელმწიფო 2016 წლის არჩევნებამდე, რომელზეც საქართველოს მოსახლეობას მიეცემა კომპეტენტური და ქმედითუნარიანი ხელისუფლების არჩევის საშუალება“, - განაცხადა ვაშაკიძემ.