,,ნაციონალური მოძრაობის საერთაშორისო მდივანი გიგა ბოკერია მიიჩნევს, რომ რუსთავი2-ის მიმართ გადადგმული ნაბიჯი კატასტროფული შედეგების მომტანი იქნება ხელისუფლებისთვის და კერძოდ, ბიძინა ივანიშვილისთვის.
,,ბიძინა ივანიშვილის ერთადერთი ამოცანაა ძალაუფლების შენარჩუნება. ამ საქმეში მას ხელს უშლის საზოგადოების თავისუფალი ნება. რუსთავი 2 ერთ-ერთი სერიოზული პრობლემაა იმიტომ, რომ ამ საზოგადოების ინფორმირებას ახდენს. სხვა ხედვა იმისთვის, რომ საზოგადოების მხარდაჭერა მოიპოვონ, არ გააჩნიათ - უნდა შეუზღუდონ საზოგადოებას ინფორმაციის წყაროები და ამიტომ არის რუსთავი 2 სამიზნე მთელი ამ წლების განმავლობაში. ეს ბოლო ნაბიჯი ძალიან სახიფათოა, ზოგადად, ქვეყნის დემოკრატიისთვის, მაგრამ კატასტროფული შედეგების მომტანი იქნება ხელისუფლებისთვის და, კერძოდ, ბიძინა ივანიშვილისთვის, როგორც პოლიტიკური ფიგურისთვის” - განაცხადა ბოკერიამ.
ბიზნესმენ ქიბარ ხალვაშის სარჩელის საფუძველზე, რუსთავი 2-ის კუთვნილ ავტომობილებს აღსრულების ეროვნულმა ბიურომ ყადაღა დაადო. იგი ამჯერად ტელეკომპანიის სრული ქონების დაყადაღებას ითხოვს. ბიზნესმენის ადვოკატი აცხადებს, რომ რუსთავი 2-ის ავტომობილების დაყადაღების შემდეგ, შესაძლოა, ტელეკომპანიის სხვა ქონებაც დააყადაღონ.
ქიბარ ხალვაშის ადვოკატი აცხადებს, რომ ეს ხელს არ შეუშლის ტელეკომპანიას ფუნქციონირებაში.