ექსპერტი ეკონომიკის საკითხებში რომან გოცირიძე არ გამორიცხავს, რომ აფხაზეთის რკინიგზის მონაკვეთის აღდგენაზე ფარული შეთანხმება არსებობდეს.
საოკუპაციო ძალების მიერ, რკინიგზის აფხაზეთის მონაკვეთის დასუფთავების დაწყებასთან დაკავშირებით, გოცირიძე აცხადებს, რომ ესაა რუსეთთან ერთი-ერთზე, ე.წ. კარასინ-აბაშიძის წარმოებული დიპლომატიის შედეგი.
,,ეს არის საქართველოს მიერ რუსეთთან წარმოებული პოლიტიკის ყველაზე სავალალო შედეგი. ჩვენი ხელისუფლების ნებართვის გარეშე აპირებენ რუსები მატარებლების გატარებას ჩვენს ტერიტორიაზე. არც ის უნდა გაგვიკვირდეს, თუ ფარული თანხმობა არის მიცემული ამის თაობაზე.
ესაა რუსეთთან ერთი-ერთზე, ე.წ. კარასინ-აბსშიძის არაფრისმომცემ რეჟიმში წარმოებული დიპლომატიის შედეგი.
პირველად აფხაზეთის რკინიგზის ერთი ნაწილის ფორსირებული აღდგენა მოხდა 2008 წლის აგვისტოს ომის წინ. იგი გამოყენებული იქნა მძიმე ტექნიკის გადასატანად, რასაც მოჰყვა კოდორის ხეობის დაკავება და სამეგრელოში შეჭრა.
რა მიზანიც არ უნდა ჰქონდეს ამჟამად რუსეთს: პროვოკაცია, შანტაჟი, რკინიგზის გახსნა თუ სხვა რამ, მხოლოდ საერთაშორისო მხარდაჭერის მობილიზებით თუ არის შესაძლებელი მისი თავიდან აცილება. ეს მეთოდი კი საქართველოს ხელისუფლებამ კარასინ-აბაშიძის კარჩაკეტილ დიალოგზე გაცვალა.
Доигрались! ამბობენ ხოლმე რუსები - ზედგამოჭრილია ჩვენზე” - წერს facebook-ის საკუთარ გვერდზე ექსპერტი.
შეგახსენებთ, რუსულმა საოკუპაციო ძალებმა აფხაზეთში რუსეთ-საქართველოს დამაკავშირებელი სარკინიგზო მაგისტრალის დასუფთავება დაიწყეს. დაახლოებით 800 სამხედროსგან შემდგარი ჯგუფი ოჩამჩირიდან ენგურამდე არსებულ მონაკვეთს ასუფთავებს. აფხაზეთის რკინიგზის ეგრეთ წოდებული სამმართველოს დირექტორის მოადგილის იგორ მარღანიას თქმით, სამხედროები ამ მონაკვეთის დასუფთავების შემდეგ მის აღდგენას დაიწყებენ.
რუსი სამხედროების მიერ რკინიგზის დასუფთავების ფაქტს ადასტურებს აფხაზეთის ეგრეთ წოდებული ტრანსპორტის სახელმწიფო სამმართველოს ხელმძღვანელი ზურაბ ხაჯიმბა, ამასთან, ხაჯიმბა ამბობს, რომ აფხაზეთში სამხედროები მოულოდნელად გამოჩნდნენ. "ჩვენი მხრიდან ამ საკითხზე არანაირი ნებართვა არ გაცემულა", - აღნიშნა მან, თუმცა დასძინა, რომ აფხაზურმა მხარემ მოსამზადებელი სამუშაოების ჩატარებაზე ნებართვა გასცა.
აფხაზეთის რკინიგზა ომის შემდგომ პრაქტიკულად ამორტიზებულია, რუსულმა საოკუპაციო ძალებმა რკინიგზის გარკვეული მონაკვეთების შეკეთება რამდენიმე წლის წინ დაიწყეს.
