პოლიტიკური გაერთიანება „საქართველოს ევროპელი დემოკრატების“ თავმჯდომარის პაატა დავითაიას შეფასებით, შესაძლოა რუსი სამხედროების მიერ რუსეთ-საქართველოს დამაკავშირებელი რკინიგზის აფხაზეთის მონაკვეთის დასუფთავება 2008 წლის მსაგვსად, გამოყენებულ იქნეს მძიმე ტექნიკის შემოსაყვანად საქართველოს კონტროლირებად ტერიტორიაზე.
” ჩვენ თუ შევადარებთ 2008 წლის მოვლენებს ვნახავთ, რომ ზუსტად ასეთი ტერმინოლოგია იყო, რომ აფხაზეთში რკინიგზის აღდგენითი სამუშაოები ტარდებაო. სინამდვილეში ეს შეიძლება გამოყენებული ყოფილიყო შეიარაღებული მძიმე ტექნიკისათვის საქართველოს კონტროლირებად ტერიტრიაზე ჩამოსაყვანად. ამიტომ რა განცხადებებს გააკეთებს რუსეთი ამას მნიშვნელობა არ აქვს. აქ საუბარია იმაზე, რა არის ფაქტი და რეალობა. ფაქტი და რეალობა მდგომარეობს იმაში, რომ დღეს თავისუფლად შეიძლება განმეორდეს ინტრევეცია რუსეთის ფედერაციის მხრიდან, ან მზადება ინტერვეციისა”, _ აცხადებს ”ჯი- ეიჩ- ენთან” პაატა დავითაია.
შეგახსენებთ, რუსულმა საოკუპაციო ძალებმა აფხაზეთში რუსეთ-საქართველოს დამაკავშირებელი სარკინიგზო მაგისტრალის დასუფთავება დაიწყეს. დაახლოებით 800 სამხედროსგან შემდგარი ჯგუფი ოჩამჩირიდან ენგურამდე არსებულ მონაკვეთს ასუფთავებს. აფხაზეთის რკინიგზის ეგრეთ წოდებული სამმართველოს დირექტორის მოადგილის იგორ მარღანიას თქმით, სამხედროები ამ მონაკვეთის დასუფთავების შემდეგ მის აღდგენას დაიწყებენ.
რუსი სამხედროების მიერ რკინიგზის დასუფთავების ფაქტს ადასტურებს აფხაზეთის ეგრეთ წოდებული ტრანსპორტის სახელმწიფო სამმართველოს ხელმძღვანელი ზურაბ ხაჯიმბა, ამასთან, ხაჯიმბა ამბობს, რომ აფხაზეთში სამხედროები მოულოდნელად გამოჩნდნენ. "ჩვენი მხრიდან ამ საკითხზე არანაირი ნებართვა არ გაცემულა", - აღნიშნა მან, თუმცა დასძინა, რომ აფხაზურმა მხარემ მოსამზადებელი სამუშაოების ჩატარებაზე ნებართვა გასცა.
აფხაზეთის რკინიგზა ომის შემდგომ პრაქტიკულად ამორტიზებულია, რუსულმა საოკუპაციო ძალებმა რკინიგზის გარკვეული მონაკვეთების შეკეთება რამდენიმე წლის წინ დაიწყეს.
