სოფლის მეურნეობის სამინისტრო ხორბლის მოსავლით კმაყოფილია. როგორც სოფლის მეურნეობის სამინისტროს რეგიონებთან კოორდინაციის დეპარტამენტის ხელმძღვანელი შალვა კერესელიძე განმარტავს, კახეთში ხორბლის მოსავლის აღება დასრულებულია და ფერმერები საკმაოდ კმაყოფილნი არიან.
”კახეთში ხორბალი 37 ათას 200 ჰა-ზე იყო დათესილი, ხოლო ქერი - 8 ათას 600 ჰა-ზე. საპროგნოზო გაანგარიშებით, წელს გაცილებით მეტი მოსავალი მოვიდა, გამომდინარე იქედან, რომ წელს გასულ წლებთან შედარებით კახეთში ხორბლისა და ქერის არნახული მოსავალი დაფიქსირდა. ჩვენი წინასწარი ოპერატიული ციფრებით, კახეთში 1 ჰა-ზე მოსავლიანობამ დაახლოებით 3,5- 3,8 ტონა შეადგინა. იყო შემთხვევები, როდესაც 1 ჰა-ზე 5 ტონამდეც აიღეს”,- აღნიშნა შალვა კერესელიძემ.
მისი ინფორმაციით, მაღალ მოსავლიანობას ამინდის გარდა ხელი ჯიშთა განახლებამაც შეუწყო.
სოფლის მეურნეობის სამინისტროში აცხადებენ, რომ კახეთში ხორბლის საერთო მოსავალი დაახლოებით 150 ათასი ტონაა.
”რაც შეხება შიდა ქართლს, მცხეთა-მთიანეთსა და ჯავახეთს, ქართლში მოსავლის აღება თითქმის დასრულებულია. მცხეთა-მთიანეთში ხორბლის აღება ჯერ კიდევ მიმდინარეობს, ხოლო სამცხე-ჯავახეთში ახალი დაწყებულია და სავარაუდოდ 2 კვირაში დასრულდება”, - აღნიშნა სოფლის მეურნეობის სამინისტროს რეგიონებთან კოორდინაციის დეპარტამენტის ხელმძღვანელმა.
შალვა კერესელიძის განმარტებით, კახეთის მსგავსად კარგი მოსავალია შიდა ქართლშიც.
წინასწარი გათვლებით, წელს ხორბლის ადგილობრივი წარმოება 180 ათასი ტონა იქნება.
