პარლამენტის დამოუკიდებელი დეპუტატი ზურაბ ჯაფარიძე აცხადებს, რომ რუსთავი2-ის მიმართ წამოწყებული კამპანია ცუდად დამთავრდება ხელისუფლებისთვის. მისი შეფასებით, რაც ტელეკომპანიასთან მიმართებაში ხდება, არანაირ კავშირში არ არის ქიბარ ხალვაშთან.
"ეს არის ხელისუფლების მიერ წამოწყებული მორიგი შეტევა დამოუკიდებელ მედიაზე, რაც საბოლოოდ ძალიან ცუდად აისახება ქვეყნის იმიჯზე და დემოკრატიულ განვითარებაზე. ვინც ამას გეგმავს და ახორციელებს ამ ომს ისინი ვერ მოიგებენ და ცუდად დამთავრდება თითოეული იმ ადამიანისა და ხელისუფლებისთვის," - აცხადებს ზურაბ ჯაფარიძე.
ბიზნესმენ ქიბარ ხალვაშის სარჩელის საფუძველზე, რუსთავი 2-ის კუთვნილ ავტომობილებს აღსრულების ეროვნულმა ბიურომ ყადაღა დაადო. ბიზნესმენმა ქიბარ ხალვაშმა ტელეკომპანია რუსთავი 2-ის ნომინალური მეპატრონეების წინააღმდეგ სასამართლოში სარჩელი შეიტანა და სარჩელის უზრუნველყოფის მიზნით, ტელეკომპანიის პარტნიორთა წილების დაყადაღება მოითხოვა.
