"ნაციონალური მოძრაობის" ერთ-ერთი ლიდერის გიგა ბოკერიას შეფასებით, ქართველი მეწარმეები რუსულ ბაზარზე, ემბარგოს გარეშეც უდიდესი საფრთხის წინაშე დგანან. რუსეთის მიერ ქართულ სურსათზე ემბარგოს შესაძლო გამოცხადებასთან დაკავშირებით ბოკერიამ ასევე განაცხადა, რომ საქართველოს მთავრობამ არ უნდა მოატყუოს ქართველი მეწარმეები და იპოვოს ახალი ბაზრები.
"საქართველოს მთავრობას რუსეთთან ურთიერთობაში აბსოლუტურად გაუაზრებელი პოლიტიკა აქვს და ეს არის ყველაზე კორექტული შეფასება. ბოლო წლების განმავლობაში ისინი გვატყუებდნენ, რომ მოსკოვთან სიტუაციის დალაგების კუთხით აქვთ წარმატება და რუსეთის ბაზარს გვიხატავდნენ, როგორც ჩვენი ეკონომიკური აღმავლობის ერთადერთ გამოსავალს, მაგრამ დღეს ვითარება შემდეგია - რუსეთის ბაზრიდან არა მარტო ემბარგოს საფრთხე არსებობს, რომლის წინაშეც საქართველო დგას, ისე როგორც უკრაინა და მოლდოვა, არამედ რუსეთის ბაზარი თავისთავად არასტაბილურია მისი მთავრობის პოლიტიკის და ამ პოლიტიკიდან გამომდინარე დასავლეთის სანქციების გამო. ემბარგოს გარეშეც მცირდება იქ ქართული პროდუქციის ექსპორტი და უდიდესი საფრთხის წინაშე დგანან ქართველი მეწარმეები. ეს ყველაფერი გვაჩვენებს შემდეგს - ჩვენ უნდა ვიპოვოთ ახალი ბაზრები და აღარ უნდა მოვატყუოთ ჩვენი მეწარმეები", - აღნიშნა ბოკერიამ.