ბათუმის ანბანის კოშკში გასართობი ობიექტები ფუნქციონირებას სექტემბერიდან დაიწყებს. როგორც აჭარის ფინანსთა და ეკონომიკის სამინისტროში განმარტავენ, ამ ეტაპისათვის კოშკის მიმდებარედ საერთაშორისო ბრენდის კაფისა და ღია ტერასის მოეწყობა მიმდინარეობს. შენობის აღდგენით სამუშაოებს კი კომპანია ”company boos spain sl“ ახორციელებს.
ინვესტორსა და აჭარის მთავრობას შორის გაფორმებული ხელშეკრულების მიხედვით, ინვესტორი ამ დროისათვის გარე ტერასის, კაფის მოწყობას და ლიფტების სარემონტო სამუშაოებს აწარმოებს. მიმდინარეობს ასევე გარე განათების ტექნიკური სამუშაოები, შენობის შეღებვა და ტერიტორიის გრანიტის ფილებით მოწყობა. როგორც აჭარის ფინანსთა და სამინისტროში განმარტავენ, გარე ტერასა და კაფე კოშკში აგვისტოს ბოლომდე გაიხსნება, თუმცა მთლიანი შენობა ექსპლუატაციაში ოფიციალურად სექტემბრიდან შევა.
შეგახსენებთ, რომ ანბანის კოშკი და მის მიმდებარედ არსებული მიწის ნაკვეთი 20 წლის სარგებლობის უფლებით ესპანურ კომპანია Boost Spain-ს გადაეცა.
მხარეებს შორის გაფორმებულ ურთიერთშეთანხმების მემორანდუმში აღნიშნულია, რომ მრავალფუნქციური ობიექტის ამოქმედებიდან სარგებლობის მთელი პერიოდის განმავლობაში, სარგებლობაში გადაცემული ნაგებობის, ლიფტების, გარე განათების სისტემების, მოვლა-პატრონობა და სარგებლობის ვადის ამოწურვის შემდეგ, მესაკუთრისათვის გამართულ მდგომარეობაში ჩაბარება, უზრუნველყოს.
ეს ყველაფერი კი იმას ნიშნავს, რომ Boost Spain S.I-ს კოშკის განათებისა და მოვლა-პატრონობის ხარჯებს თავად დაფარავს, ეს იმ ფონზე, როდესაც აჭარის ბიუჯეტს ანალოგიური ხარჯი წელიწადში 700 ათასი ლარი უჯდებოდა.
თავის დროზე ანბანის კოშკის მშენებლობა ბიუჯეტს 65 მლნ ლარი დაუჯდა. “საოცრებათა პარკის” ტერიტორიაზე განთავსებული ქართული ანბანისადმი მიძღვნილი თანამედროვე არქიტექტურული ნაგებობის სიმაღლე 135 მეტრია. აღსანიშნავია, რომ ქართული ანბანის ოცდაცამეტივე ასო კოშკზე წარმოდგენილია მხედრულად, ხოლო ანბანის თითოეული ასოს სიგრძე 3 მეტრი და 70 სმ-ია. შენობა მთლიანად რკინისაა და მასში გადაადგილება მხოლოდ ლიფტითაა შესაძლებელი, რომელიც, თავის მხრივ, შემინულ პანორამულ კონსტრუქციას წარმოადგენს.
ქართული ანბანის კოშკი ბათუმის სიმბოლოდ ითვლება და სხვა შენობებისგან იმით გამოირჩევა, რომ იგი ქალაქში ერთ-ერთი მაღალი შენობაა. კოშკის სფერო სამ სართულიანია (ფართი 1252 კვ.მ.). ორი სართული განკუთვნილია მბრუნავი რესტორნისთვის და ოფისისთვის. სფერო ერთი საათის განმავლობაში ერთ სრულ ბრუნს ასრულებს, საიდანაც ქალაქის ხედები არაჩვეულებრივად ჩანს.
