სექტემბრიდან პურზე ფასის 10 თეთრამდე გაზრდას ვარაუდობენ. როგორც ”ჯი-ეიჩ- ენს” შპს ”იფქლის” და პურპროდუქტების ასოციაციის ხელმძღვანელებმა განუცხადეს, პურის ღირებულებაზე გავლენას ფქვილზე ფასის მატებას მოახდენს.
” პურის ფასს ვერ შევინარჩუნებთ სამწუხაროდ. სექტემბრამდე თუ მოვახერხებთ დიდი საქმე იქნება. თუკი ფქვილის ფასი არ დარეგულირდა და დარჩება ის რაც არის დღეს, პურს აუცილებლად ფასი მოემატება. დაახლოებით 10 თეთრით გაძვირდება. ამის მიზეზი არის ის, რომ 10 ივნისიდან დღემდე ერთი ტომარა ფქვილის ფასი გაიზარდა 37 ლარიდან 44 ლარამდე. ეს არის ძალიან ბევრი. გავლენას იქონიებს დენის ტერიფის მატებაც. ამას ემატება ლარის გაუფასურებაც, თუკი ასე გაგრძელდება, რა მოყვება ამ ყველაფერს არ ვიცი”, _ აღნიშნა შპს ”იფქლის” გენერალური დირექტორმა შაქრო ბაკურაძემ.
ფასის მატებას არც პურპროდუქტების ასოციაციის თავმჯდომარე მალხაზ დოლიძე გამორიცხავს. მისი თქმით, ფასების ზრდა უკვე შინიშნება და თუკი კონკრეტული ნაბიჯები არ გადაიდგა პურის გაძვირება გარდაუვალია.
”პატარა საცხობებში ცოტა-ცოტა მოუმატეს. ზოგმა წონის კორექტირება მოახდინა, ნაწილმა ფასის. მაგალითად, მომაწოდეს ინფორმაცია, რომ ერთ- ერთ თონეში წონაში აკლებენ და თონის პური 300 გრამი გახადეს, თემქაზე თონეში 5 თეთრით მოუმატეს პურს, ასეთი წვრილ- წვრილი შემთხვევები არის. ჩვენ ვიყავით სამინისტროში, ეს ამბავი მოვახსენეთ და ვთხოვეთ რაღაცა რეზერვის გამოყოფას. ველოდებით კონკრეტული ნაბიჯების გადადგმას. ჩვენ გვინდა, რომ, საბაზრო ეკონომიკაში იქნეს შეჯიბრობა, რომ მონოპოლისტობა არ იყოს და ფასები დარეგულირდეს. სექტემბრამდე ყველა ვცდილობთ ფასის დაჭერას. თუკი ფქვილზე ღირებულება იგივე იქნება და დენის ტარიფზეც ფასი მოიმატებს მაშინ, რა თქმა უნდა, ეს იმოქმედებს პროდუქციის თვითღირებულებაზე და 10 თეთრამდე გაძვირდება. გააჩნია სურვილს”, - აცხადებს მალხაზ დოლიძე და იმედს გამოთქვამს, რომ ეკონომიკური გუნდი რამეს მოიმოქმედებს.
