არასამთავრობო ორგანიზაცია ,,საქართველოს რეფორმების ასოციაციის” დამფუძნებლის ელენე ხოშტარიას შეფასებით, ემბარგო, რომელსაც რუსეთი დაუწესებს საქართველოს არის საქართველოს ბრალი.
მისი განმარტებით, საქართველო ცვლის დამოკიდებულებებს რუსეთის მუქარის მიხედვით, რითაც აჩვევს, რომ მუქარის პოლიტიკა ეფექტურია.
,,ჩვენ ვთქვით, რომ ემბარგო, რომელიც საქართველოს დაუწესა რუსეთმა და აუცილებლად კიდევ დაუწესებს, იმიტომ, რომ რუსეთი მუდმივად ეკონომიკას იყენებს პოლიტიკური მიზნებისთვის, არის არა საერთაშორისო სამართლის დარღვევა, რასაც ყველა აღიარებს, არამედ ჩვენი ბრალი. ამ მხრივ ფაქტობრივად ვჭრით ყველანაირ გზას ამ პრობლემის საერთაშორისო მეგობრობის ჩართულობის გზით გადაჭრისას. მეორე, ჩვენ პრაქტიკულად ვემიჯნებით მთელ ცივილიზებულ სამყაროს, რომელიც ერთხმად იძახის, რომ რუსეთი არის აგრესორი. ჩვენ რუსეთს ვაჩვევთ, რომ თუ დაგვემუქრება, ჩვენ მზად ვართ შევცვალოთ ჩვენი დამოკიდებულებები, მათ შორის ისეთ საკითხებზე, რომლებიც არის ჩვენი ეროვნული ინტერესების შემცველი. მაგალითად, როდესაც აბაშიძემ თქვა, რომ აქ არ განლაგდება ნატოს ინფრასტრუქტურა ლავროვის მუქარის შედეგად, დღეს ღარიბაშვილი ამბობს, რომ არანაირი სანქცია, იმიტომ რომ რუსეთი დაგვემუქრა. ეს ნიშნავს, რომ რუსეთი გრძნობს, რომ მისი ჩვენზე მუქარის პოლიტიკა ეფექტურია”, - განაცხადა რუსთავი2-ის ეთერში ელენე ხოშტარიამ პრემიერ მინისრის ირაკლი ღარიბაშბილის მიერ, რუსეთის ემბარგოსთან დაკავშირებით გაკეთებულ განცხადებაზე საუბრისას.
საქართველოს პრემიერ-მინისტრმა ირაკლი ღარიბაშვილმა ჟურნალისტებს "როსპოტრებნაზორის" განცხადების შეფასებისას განუცხადა, რომ საქართველოს მთავრობა არ აპირებს შეუერთდეს რუსეთის წინააღმდეგ დაწესებულ სანქციებს.
