საპარლამენტო ფრაქცია „ნაციონალური მოძრაობის“ წევრმა მიხეილ მაჭავარიანმა პრემიერ- მინისტრის განცხადებას რუსეთის წინააღმდეგ სანქციებთან დაკავშირებით, არაადეკვატური უწოდა. მისი თქმით, საქართველო სრულიად ამოვარდნილია მსოფლიო პოლიტიკიდან.
” ჩვენმა პრემიერმა კიდევ ერთხელ დაადასტურა, რომ აბსოლუტურად არაადეკვატურია. მთელი მსოფლიო ახლა რუსეთის აგრესიას გმობს, საქართველოს პრემიერი კი ასე იქცევა. ძალიან სამწუხაროა, რომ აქაც ამოვარდნილები ვართ მსოფლიო პოლიტიკიდან. ჩვენ ყოველთვის ვეუბნებით, რომ იქნებოდა უნიკალური - საქართველოს საკითხი უკრაინასთან ერთ კონტექსტში დაგვეცვა. საქართველოს პრემიერ - მინისტრი და საქართველოს მთავრობა აბსულუტურად არაადექვატურად უყურებს პოლიტიკურ სიტუაციას” - განაცხადა მაჭავარიანმა.
მისივე თქმით, საქართველოს მთავრობას სრულიად ახალი პერსპექტივა გაეხსნა ასოცირების ხელშეკრულების სახით, თუმცა იგი მაინც რუსეთის ბაზრისკენ იყურება.
,,რომელი უფრო დიდი ბაზარია, ევროკავშირის 600 - 700 მილიონიანი ბაზარი, თუ რუსეთის? ასოცირების ხელშეკრულებას შარშან მოვაწერეთ ხელი. ჩვენს მთავრობას გაეხსნა ახალი პერსპექტივა, ევროკავშირში და იმის მაგივრად, რომ ამ მიმართულებით იმუშაოს, სამწუხაროდ ისევ ჩამოკიდებულნი ვართ რუსულ ბაზარზე. რა მოხდა რუსულ ბაზარზე, ფაქტობრივად გამესამედდა საქართველოდან გატანილი პროდუქტი. საქართველოს მთავრობა არ ეგუება ახალ რეალობას და ისევ მსოფლიოს თანამეგრობრობის დინების საწინააღმდეგოდ მოქმედებს”, _ აცხადებს ”ჯი-ეიჩ- ენთან” საუბარში მიხეილ მაჭავარიანი.
