ციხეებში საზოგადოებრივი მონიტორინგისთვის პირველ რიგში სტანდარტებია დასაცავი, ამიტომ უნდა ვიმუშაოთ მექანიზმებზე, - განაცხადა არასამთავრობო სექტორის წარმომადგენლების ინიციატივასთან დაკავშირებით სასჯელაღსრულების ახალმა მინისტრმა.
თუმცა, კახა კახიშვილმა აქვე აღნიშნა, რომ საზოგადოებრივი მონიტორინგი სასჯელაღსრულების დაწესებულებებში ახლაც არსებობს.
,,ისე არ უნდა იყოს აღქმული, რომ საზოგადოებრივი მონიტორინგი არ არსებობს. თავად სახალხო დამცველის პრევენციის ეროვნული მექანიზმის წევრები, ფაქტობრივად, ყოველდღიურად, ყველა დაწესებულებაში შედიან, ესაუბრებიან პატიმრებს და ამის მექანიზმები გაწერილია. მოგეხსენებათ, რომ ჩვენ ვიყავით სწორედ ის ადამიანები, რომლებმაც მივეცით სახალხო დამცველის პრევენციული მექანიზმის წევრებს ციხეებში ფოტოაპარატით შესვლის უფლება, მაგრამ, მეორე მხრივ, ციხეში უნდა იყოს სტანდარტები, რომელიც უნდა იყოს, იმიტომ რომ ის არის ციხე და დახურული სარეჟიმო დაწესებულება. სასამართლოს თავის დროზე ასეთი კონტაქტები რომ დაეშვა, მაშინ თავად პატიმრობას არ მიუსჯიდნენ", - განაცხადა კახიშვილმა.
მინისტრის თქმით, სასჯელაღსრულების დაწესებულებებაში მუშაობას სჭირდება შესაბამისი უნარ-ჩვევები და თუკი შეთანხმდებიან ასეთ უნარ-ჩვევებზე, სტანდარტებზე, იმაზე როგორ უნდა შევიდნენ, როგორ უნდა აწარმოონ დახურულ სისტემაში თავისი საქმიანობა, მაშინ არასამთავრობო სექტორის ინიციატივაში მიუღებელი არაფერი იქნება.
შეგახსენებთ, არასამთავრობო სექტორი სასჯელაღსრულების ახალ მინისტრ ციხეებში საზოგადოებრივი მონიტორინგის მექანიზმის შექმნას სთხოვს. შეხვედრა ამ დროისთვის სამინისტროში მიმდინარეობს.
