თურქეთის საკურორტო ზონებით ქართველი ტურისტების დაინტერესება არ შემცირებულა, ამის შესახებ „ჯი-ეიჩ-ენთან“ საუბარში ტურისტული კომპანია Go Tour -ის დამფუძნებელმა ნინო წიკლაურმა განაცხადა.
წიკლაურის ინფორმაციით, მისმა კომპანიამ თურქეთის მიმართულებით საკმაოდ ბევრი ტურისტული პაკეტი გაყიდა, თუმცა მისი შეცვლისთვის კომპანიისთვის არავის მიუმართავს.
წიკლაურის განმარტებით, გუშინ დაფიქსირდა შემთხვევა, როდესაც ოჯახმა თურქეთში დასვენებას ეგვიპტეში დასვენება ამჯობინა.
”თურქეთის მიმართულებით წინასწარ საკმაოდ ბევრი პაკეტები გვაქვს გაყიდული, ეს ინტერესი დღესაცაა, მოდიან და გვიკვეთავენ. თუმცა შემთხვევა, რომ ვინმეს თურქეთში დასვენება გადაევადებინა არ გვქონია. გუშინ დაგვიფიქსირდა ასეთი შემთხვევა, რომ ოჯახს თურქეთში უნდოდა დასვენება, თუმცა მაინც თავი შეიკავეს და საბოლოოდ არჩევანი ეგვიპტეზე გააკეთეს. იმედია, რომ ყველაფერი კარგად იქნება. სამომავლოდ რა მოხდება არ ვიცი. თურქეთში მიმდინარე მოვლენებს თვალს ვადევნებთ და იმედი მაქვს, რომ საკურორტო ზონებში ანალოგიური პრობლემები არ შეიქმნება, რაც საზღვრისპირა რეგიონებშია”- აღნიშნა Go Tour -ის დამფუძნებელმა.
შეგახსენებთ, რომ თურქეთის სამხრეთ-აღმოსავლეთ პროვინციებში უკანასკნელ პერიოდში გახშირებული ტერორისტული აქტებიდან და თავდასხმებიდან გამომდინარე, საქართველოს საგარეო საქმეთა სამინისტრო ურჩევს საქართველოს მოქალაქეებს, თავი შეიკავონ თურქეთის სამხრეთ-აღმოსავლეთ რეგიონში გადაადგილებისაგან. კერძოდ, არდაჰანის, ერზერუმის, ერზინჯანის, ყარსის, იღდირის, აღრის, ვანის, ბითლისის, მუშის, ბინგოლის, ელაზიღის, თუნჯელის, მალათიას, შალნიურფასა და ჰაქქარის ვილაიეთების მიმართულებით გადაადგილებისგან. ”საჭიროების შემთხვევაში, საქართველოს მოქალაქეებს შეუძლიათ დაუკავშირდნენ თურქეთის რესპუბლიკაში საქართველოს დიპლომატიურ და საკონსულო დაწესებულებებს”,- აცხადებენ საგარეო საქმეთა სამინისტროში.
