რუსთავი2-ის გენერალური დირექტორი დარწმუნებულია, რომ ქიბარ ხალვაში ტელეკომპანიის დღევანდელ მფლობელებეთან სამართლებლივად ვერაფერს მიაღწევს, რადგან ისინი კეთილსინდისიერი შემძენები არიან. ნიკა გვარამიას თქმით, მაქსიმალური რასაც ხალვაშმა შესაძლოა მიაღწიოს, ეს არის კომპენსაცია.
,,ირაკლი ოქრუაშვილის მტაცებელი ქოფაკი ქიბარ ხალვაში სხვას რომ რამის მიტაცებაში ედავება, ძალიან სასაცილო და ცინიკურია. სამართლებრივად რაიმეს მიღწევა რუსთავი 2-ის დღევანდელი მფლობელების წინააღმდეგ შეუძლებელია, ამის შანსი არის ნულოვანი, რადგან ისინი არიან კეთილსინდისიერი შემძენები. მაქსიმუმი, რასაც ქიბარ ხალვაშმა შეიძლება მიაღწიოს, ეს არის კომპენსაცია, რომელიც უნდა გადაუხადოს მას სახელმწიფომ ან იმ პირმა, ვინც რამე წაართვა, რაშიც ძალიან ღრმად შემაქვს ეჭვი. ძალიან საინტერესოა როგორ მოიქცევა სასამართლო. მე იმედი მაქვს, რომ ტოტალიტარიზმისკენ მიმავალი ხელისუფლების თანამონაწილეობას ის არ განიზრახავს და არ წაუცდება ხელი უკანონო გადაწყვეტილებისკენ... საბოლოო ჯამში, ეს არ არის ქიბარ ხალვაშის თამაში. თავისთავად ცხადია, ეს არის ხელისუფლების თამაში, რომელიც ბოლო პერიოდში შეპყრობილია ტოტალიტარული შიზოფრენიით და ბოლო წერტილი, როგორც ჩანს, იყო მრავალათასიანი კონცერტები. ბოლო კოზირი, როგორც ჩანს, არის ქიბარ ხალვაში. როგორც სხვა მხარეებიდან არ გამოვიდა, ისე ამ მხარიდან არ გამოვა” - აცხადებს გვარამია.
ბიზნესმენმა ქიბარ ხალვაშმა ტელეკომპანია „რუსთავი 2“-ის ნომინალური მეპატრონეების წინააღმდეგ სასამართლოში სარჩელი შეიტანა და სარჩელის უზრუნველყოფის მიზნით, ტელეკომპანიის პარტნიორთა წილების დაყადაღება მოითხოვა.
ხალვაშის ადვოკატის პაატა სალიას ინფორმაციით, მეშვიდე წელია, ბიზნესმენი მის მიმართ განხორციელებული ძალადობით, ტელეკომპანია „რუსთავი2“ 2004 წელს დაახლოებით შვიდ მილიონ დოლარად შეიძინა, ხოლო 2006 წლის ბოლოს ხელისუფლების უმაღლესი ეშელონების წარმომადგენლების, მათ შორის, პრეზიდენტ სააკაშვილის ზეწოლით, მას ტელეკომპანიის წილი დაათმობინეს.
