”კონკურენციის სააგენტო არ დაუშვებს ბიზნესის თავისუფლების შეზღუდვას, რაც საქართველოს მთავრობისა და სახელმწიფოს უმთავრესი პრიორიტეტია”,- აღნიშნულია კონკურენციის სააგენტოს განცხადებაში.
როგორც უწყებაში განმარტავენ, კონკურენციის სააგენტოს უფლებამოსილების დახვეწასთან დაკავშირებით, სააგენტოს თავმჯდომარის, გიორგი ბარაბაძის განცხადება არასწორად იქნა აღქმული.
”უპირველეს ყოვლისა, ხაზგასმით აღვნიშნავთ, რომ საუბარია სააგენტოს საქმიანობის ეფექტიანობის გაზრდაზე, რაც, რა თქმა უნდა, არ ნიშნავს იმას, რომ სააგენტო ჩხრეკის უფლებას ითხოვს. სააგენტოს აღნიშნული მოთხოვნა ვერც ექნება, ვინაიდან სისხლის სამართლის საქმის მწარმოებელი ორგანო არ არის.
„კონკურენციის შესახებ“ საქართველოს კანონის ევროპულ კანონმდებლობასთან ჰარმონიზაციის მიზნით, ჩვენ ვსწავლობთ წამყვანი ევროპული ქვეყნების გამოცდილებას, რაც სამომავლოდ სააგენტოს საქმიანობის მოქნილობასა და გაუმჯობესებას შეუწყობს ხელს.
ხაზგასმით ვაცხადებთ, რომ კონკურენციის სააგენტო არ დაუშვებს ბიზნესის თავისუფლების შეზღუდვას, რაც საქართველოს მთავრობისა და სახელმწიფოს უმთავრესი პრიორიტეტია”,- აცხადებენ სააგენტოში.
