ახალგაზრდა ფინანსისტთა და ბიზნესმენთა ასოციაციის ანალიტიკოსის პაატა ბაირახტარის თქმით, ტურისტული სეზონი მიმდინარეობს და ის ჯერ აქტიურ ფაზაში არ შესულა. ანალიტიკოსი მიმდინარე პროცესების შედეგად, ლარის გამყარებას აგვისტოს მეორე ნახევრიდან ვარაუდობს.
”ამას არ აქვს მყისიერი ეფექტი, რასაკვირველია ტურისტული სეზონი ქვეყნის ეკონომიკაზე და ვალუტაზე დადებითად აისახება, მაგრამ ეს ასე მცირე დროში არ მოხდება. ტურისტი, რომ შემოვა და ქვეყანაში უცხოურ ვალუტას ტოვებს ეს არ ნიშნავს, რომ მეორე დღეს ეროვნული ვალუტა გამყარდეს.
თანაც ჩვენ უნდა დავიწყოთ საუბარი იქედან, როდესაც დაიწყო ლარმა პირველი გაუფასურება. ეს იყო გასული წლის შემოდგომა. მაშინ რეგიონი იყო ჩაფლული კრიზისში. როდესაც სავაჭრო პარტნიორ ქვეყანაში ასეთი მდგომარეობაა, შეუძლებელია ამას გვერდი აუქციო. ასე მოხდა ჩვენს შემთხვევაშიც. ამას დაემატა ეროვნული ბანკის და ეკონომიკური გუნდის არაშეწყობილი ქმედება. მაშინ, როდესაც ეროვნულ ბანკს შეეძლო გაეკეთებინა გარკვეული ინტერვენციები, ის ამას არ აკეთებდა, ანუ ბაზარზე სანამ შეინიშნებოდა მცირედი რყევები, მას ის არ ახდენდა, ბაზრის სტაბილიზაციას. როდესაც სავალუტო ბაზარზე მოხდა შოკი მხოლოდ ამის შემდეგ დაიწყო ეროვნულმა ბანკმა საჭირო ინტერვენციების განხორციელება, რაც უკვე რეალურად შედეგს აღარ იძლეოდა.
ტურისტების ნაკადის ზრდა შედეგს გამოიღებს, ლარი გამყარებას სეზონის დასრულების შემდეგ უნდა ველოდოთ. სადღაც აგვისტოში”, _ აცხადებს ”ჯი-ეიჩ-ენთან” საუბრისას ახალგაზრდა ფინანსისტთა და ბიზნესმენთა ასოციაციის ანალიტიკოსი პაატა ბაირახტარი.
