საპარლამენტო უმრავლესობის დეპუტატის ანი მიროტაძის შეფასებით, ,,ქართული ოცნების” რეიტინგი შესუსტდა, თუმცა არ ფიქრობს, რომ ეს არჩევნების შედეგებზე გავლენას მოახდენს. მისი თქმით, ერთი წელი საკმარისია შეცდომების გამოსასწორებლად.
დეპუტატმა ”ჯი- ეიჩ- ენთან” იმ ხარვეზებზე და მიმართულებებზე ისაუბრა, რომელიც ყველაზე სუსტია, თუმცა აღნიშნა, რომ არსებული პოლიტიკური ძალების ფონზე, ამომრჩეველი ზურგს არ აქცევს ხელისუფლებას.
” რა თქმა უნდა, გარკვეული რეიტინგის ცვლილება არის, მაგრამ ეს არ ნიშნავს იმას, რომ ამომრჩეველმა ზურგი აქციოს ჩვენს ხელისუფლებას, მითუმეტეს იმ პოლიტიკური ძალების ფონზე, რომელიც დღეს არის წარმოდგენილი. ხშირ შემთხვევაში გადაუწყვეტელი პრობლემები ხელისუფლების რეიტინგზე აისახება. ყველა ოჯახი საკუთარ თავზე უნდა გრძნობდეს იმ სიკეთეებს, რომელიც ამა თუ იმ ხელისუფების არსებობის დროს არის და თუ რაიმე გართულებულია, ეს ავტომატურ რეჟიმში იწვევს იმედგაცრუებას, თუმცა მე არ ვფიქრობ რომ ეს არის ის მოცემულობა, როდესაც ჩვენი ამომრჩეველი წავა და სხვა პოლიტიკურ ძალას მისცემს ხმას. შეცდომები უდაოდ გვქონდა, თუმცა ეს არ არის ფუნდამენტური. ერთი წელი საკმარისია გამოსასწორებლად. ეკონომიკური მიმართულება არის ყველაზე მძიმე. როდესაც ლარის კურსი 2,27 -ია, ვერ ვიტყვი, რომ მდგომარეობა ქვეყანაში კარგია. ვგულისხმობ ყველა ფაქტორს- საგარეო, საშინაო, საინვესტიციო, რეგიონალურს, ყველაფერს”, _ აცხადებს ანი მიროტაძე.
მან ასევე აღნიშნა, რომ არსებობს გარკვეული მოცემულობები, რამაც ზეგავლენა მოახდინა ლარის კურსზე. მისი განმარტებით, ინვესტიციების ის რაოდენობა, რასაც ელოდებოდნენ, ვერ შემოვიდა.
პარტიამ ,,ქართული ოცნება - დემოკრატიული საქართველო" არჩევნებისთვის მზადების შესახებ განცხადება გუშინ, 3 აგვისტოს გააკეთა. პოლიტსაბჭოს სხდომაზე კონკრეტული ღონისძიებების ნუსხა შეჯერდა. სექტემბრიდან პარტია ხვადასხვა აქტივობებსა და ღონისძიებებს გეგმავს რეგიონებში.
