თბილისის საკრებულოს "ნაციონალური მოძრაობის" დეპუტატი სევდია უგრეხელიძე უმრავლესობის წევრებს მოუწოდებს - ქალაქ თბილისის 2015 წლის ბიუჯეტის ცვლილებებში, სტიქიით დაზარალებულთა მოძრავი ქონების ანაზრაურებაც იქნას გათვალისწინებული.
დღევანდელი სხდომის დაწყებამდე მან ჟურნალისტებს განუცხადა, რომ ოპოზიციური ძალა პასუხისმგებლობას ბიუჯეტზე ვერასდროს აიღებს, მითუმეტეს ისეთ დროს, როცა მოქალაქეების სოციალური მდგომარეობა არ არის გათვალისწინებული. ის ასევე სტიქიით დაზარალებულთა საკითხსაც შეეხო და მათთვის დახმარების გაწევა მოითხოვა.
”საერთოდ არ აინტერესებთ მოქალაქეების გასაჭირი, მათი საჭიროებები, მხოლოდ და მხოლოდ საკუთარ ჯიბეებზე და საპიარო საკითხებზე ზრუნავენ. ჩვენ მოვითხოვთ, რომ განსაზღვრული იქნეს მოქალაქთა დახმარების მიზნით, ვაუჩერის გაცემის ისეთი რაოდენობა და ფორმა, რომელიც მათ კომუნალურ გადასახადებში შეეხიდება და ეს შეეხება მართლაც გაჭირვებულ მოსახლეობას. ჩვენ ასევე მოვუწოდებთ მათ, რომ სტიქიით დაზარალებულები იქნას დაკმაყოფილებულნი, მათ შორის მოძრავი ქონების მფლობელები და ასევე მოსარგებლეები.”,_ განაცხადა სევდია უგრეხელიძემ.
შეგახსენებთ, თბილისის საკრებულოს საფინანსო-საბიუჯეტო კომისიის სხდომაზე გახდა ცნობილი, რომ 20 მლნ ლარი გათვალისწინებულია სტიქიური უბედურებების შედეგად მიყენებული ზარალის აღმოსაფხვრელად, აქედან დაახლოებით 17 მლნ ლარია გამოყოფილი ინფრასტრუქტურული პროექტებისათვის.
